2025 jyly úsh aýysymdy jáne apatty jaǵdaıdaǵy mektepter problemasy tolyq sheshiledi

NUR-SULTAN. QazAqparat – Qazir elimizde apatty jaǵdaıdaǵy 30-ǵa jýyq mektep bar. Olardyń ornyna jańa mektep salý jumysy júrip jatyr. Bul týraly QR Oqý-aǵartý mınıstri Ashat Aımaǵambetov málim etti, dep habarlaıdy QazAqparat tilshisi.

«Búginde elimizde 7600-den astam mektep bar. Sonyń ishinde apatty jaǵdaıdaǵy mektepter problemasy da sheshilip jatyr. Qazir apatty jaǵdaıdaǵy 30-ǵa jýyq mektep bar. Olardyń ornyna jańa mektep salý jumysy júrip jatyr. Atap aıtsaq, ótken jyly 277 jańa mektep ashylsa, bıyl 260-qa jýyq mektep qoldanysqa beriledi. Ózderińiz biletindeı, Prezıdent tapsyrmasyna sáıkes 2025 jylǵa deıin 1 myń mektep salý mindeti tur», - dedi Ashat Aımaǵambetov elordadaǵy №86 mektep-gımnazııada ótken alǵashqy qońyraý saltanatty sharasy barysynda.

Onyń aıtýynsha, mınıstrliktiń maqsaty – apatty jaǵdaıdaǵy mektepterdi múmkindiginshe erterek anyqtap, ony jańaǵa aýystyrý.

«2025 jylǵa deıin 1 myń mektepti salý arqyly elimizde tolyǵymen úshaýysymdy jáne apatty jaǵdaıdaǵy mektepter problemasy sheshiletin bolady. Apatty jaǵdaıdaǵy mektepter boıynsha biz jyl saıyn tekseris júrgizip, anyqtap otyramyz», - deıdi ol.

Buǵan deıin oqý-aǵartý mınıstri halyqaralyq olımpıadalardyń jeńimpazy atanǵan oqýshylardyń JOO-ǵa tegin túsý múmkindiginiń beriletini týraly málim etken edi.

Aıta keteıik, búgin bilim kúnine oraı Ashat Aımaǵambetov elordadaǵy №86 mektep-gımnazııasynda alǵashqy qońyraý saltanatty sharasyna qatysty.