2025 jyly Shymkent donor qala deńgeıine jetedi

ASTANA. QazAqparat - Aldaǵy segiz jylda Shymkent respýblıkalyq bıýdjettiń donor qalasy deńgeıine jetedi. Bul týraly Parlament Májilisiniń jalpy otyrysynda QR Ulttyq ekonomıka birinshi vıtse-mınıstri Rýslan Dálenov málim etti, dep habarlaıdy QazAqparat.

«Búginde Túrkistan jáne Shymkent qalalary respýblıkalyq bıýdjetten sýbventsııa alady. Mysaly, Astana men Almaty qalalary donor bolyp otyr. Árıne, Shymkent donor qala deńgeıinde emes. Aldaǵy ýaqytta Shymkenttiń bıýdjeti ózin tolyqtaı qamtamasyz ete alady. Bizdiń boljamymyz boıynsha 8-15 jylda Shymkent qalasy dotatsııalyq óńirden donor shahar deńgeıine kóshedi», - dedi ol.

Rýslan Dálenovtyń sózine qaraǵanda, Shymkent 2025 jyldan bastap donor qala bolýy múmkin.

Sonymen qatar, ol Shymkenttegi jer salyǵy 2020 jyldan bastap ósetinin atap ótti.

«Shymkent jáne Túrkistan qalalarynyń mártebesi ózgerip jatyr. Osyǵan baılanysty múlik pen jer telimine salyq stavkalary ózgeredi. Sonymen birge biz halyqtyń tabys deńgeıin, eńbekaqysyn, jergilikti bıýdjettiń qajettiligin eskerdik. Sondyqtan stavkalar birden kóterilmeıdi, ıaǵnı ótpeli kezeń bar. Jańa stavkalar 2020 jyldan kúshine enedi, al 2018 jáne 2019 jyly onyń mólsheri burynǵy deńgeıde saqtalady. Atap aıtqanda, 2020 jyldan jańa sýbventsııa esepteý bastalady, olar bizde úsh jylǵa eskeriledi»,   - dedi birinshi vıtse-mınıstr.

Budan buryn habarlanǵandaı, búgin Parlament Májilisiniń jalpy otyrysynda «Qazaqstan Respýblıkasynyń keıbir konstıtýtsııalyq zańdaryna Qazaqstan Respýblıkasynyń  ákimshilik-aýmaqtyq qurylysy máseleleri boıynsha ózgerister engizý týraly» zań jobasy birinshi oqylymda maquldandy.