2025 jyly QazaqGaz kompanııasy IPO-ǵa shyǵady

ASTANA. QazAqparat – QazaqGaz kompanııasy IPO-ǵa shyǵýǵa daıyndalyp jatyr. Bul týraly atalǵan kompanııanyń basqarma tóraǵasy Sanjar Jarkeshov aıtty, dep habarlaıdy QazAqparat tilshisi

«Bul baǵytta 2025 jyl belgilengen. IPO-ǵa qarjy naryǵy yqpal etetini belgili. Sondyqtan tıisti qadamdardy tabysty iske asyrý úshin durys jospardy qurý mańyzdy. Sebebi álemde qarjy salasynda jáne geosaıası baǵytta ózgerister kóbeıip ketti. Osy oraıda IPO-ǵa utymdy túrde shyǵýǵa erekshe mán beremiz», - dedi S. Jarkeshev Astana halyqaralyq forýmy barysynda tilshiler suraǵyna jaýap bere otyryp.

Budan buryn habarlanǵandaı, elordada 8-9 maýsym aralyǵynda «Astana halyqaralyq forýmy» ótedi. Halyqaralyq is–shara asa mańyzdy jahandyq máselelerdi sheshýge jáne elaralyq yntymaqtastyqty odan ári damytýǵa baǵyttalǵan.

Búgingi forým aıasynda QazaqGaz kompanııasy óziniń gaz salasyndaǵy jańa strategııasyn tanystyrady.