2025 jyly óńirlerdiń kirisi 6,1 trln teńgege ósedi

NUR-SULTAN. QazAqparat – 2025 jyly óńirlerdiń kirisi 6,1 trln teńgege ósedi. Bul týraly búgin Májiliste QR Ulttyq ekonomıka vıtse-mınıstri Azamat Ámrın aıtty, dep habarlaıdy QazAqparat tilshisi.

«Respýblıkalyq jáne oblystyq bıýdjetter, respýblıkalyq mańyzy bar qalalar, astana bıýdjetteri arasyndaǵy 2023-2025 jyldarǵa arnalǵan jalpy sıpattaǵy transfertterdiń kólemi týraly» Zań jobasy ákimshilik-aýmaqtyq qurylymdy onyń ishinde úsh jańa oblysty qaıta qurý jaǵdaıynda, sondaı-aq Memleket basshysynyń bıýdjetaralyq qatynastardy keshendi reformalaý jónindegi qańtardaǵy tapsyrmalarynda qoıǵan mindetterin eskere otyryp ázirlendi»,- dedi vıtse-mınıstr.

Azamat Ámrınniń atap ótýinshe, jalpy sıpattaǵy jańa úsh jyldyq transfertter jańa tásilder eskerile otyryp eseptelgen jáne Úkimettiń aldyna qoıylǵan negizgi mindetterdi sheshýge, onyń ishinde óńirlerdiń qarjylyq derbestigin keńeıtý, halyq úshin áleýmettik ıgilikter men memlekettik kórsetiletin qyzmetterdiń qoljetimdiligin teńestirý, sondaı-aq ortalyq pen óńirler arasyndaǵy transfert kólemin birtindep qysqartý jónindegi mindetterdi sheshýge baǵyttalǵan.

«Úkimet aldaǵy úsh jyl ishinde óńirlerge shamamen 300 mlrd teńge kóleminde qosymsha túsimderdi berý tájirıbesin jalǵastyrady. Bizde shaǵyn jáne orta bıznesten korporatıvti tabys salyǵyn berýdiń oń tájirıbesi bar. Ótken jyldyń qorytyndysy boıynsha ǵana asyra oryndaý 70,8 paıyzdy qurady. Munyń aldynda úsh jyldyq kezeńge bergen salyqtyq demalystardyń bıyl aıaqtalýy qosymsha serpin beredi. Boljam boıynsha óńirlerdiń kirisi 2022 jyly 4,3 trln teńgeden 2025 jyly 6,1 trln teńgege ósedi», - dedi ol.