2025 jyly munaıdan tys bıýdjet tapshylyǵy 5,3% shamasynda boljanady

NUR-SULTAN. QazAqparat – QR Ulttyq ekonomıka mınıstri Álibek Qýantyrov 2025 jylǵa deıin bıýdjet tapshylyǵy qalaı qubylatynyn málim etti, dep habarlaıdy QazAqparat tilshisi.

«Bıýdjet tapshylyǵynyń jalpy ishki ónimge qatysy 2023 jyly 2,7% deńgeıinde, al 2024-2025 jyldary 2,6 jáne 2,5%-ǵa deıin tómendete otyryp, aıqyndaý usynylady.

Munaıdan tys tapshylyq deńgeıi JІÓ-ge qatysty 2023 jyly 6,8%-dan 2025 jyly 5,3%-ǵa deıin tómendeıdi dep boljanady. Bul Ulttyq damý josparynyń mánine sáıkes keledi», - dedi mınıstr.

Sondaı-aq, ol 2023 jyldan bastap Ulttyq qordan munaı salyǵynyń túsimderin ǵana alý josparlanyp otyrǵanyn jetkizdi.

«Ulttyq qordan kepildendirilgen transferttiń kólemi jańa bıýdjet qaǵıdasymen shektelgen, boljam boıynsha olar munaı sektory uıymdarynan Ulttyq qorǵa túsetin tikeleı salyqtar kóleminen aspaıtyn bolady.

Úkimettiń 2022 jylǵa arnalǵan daǵdarysqa qarsy sharalar josparynyń is-sharalaryn jáne Memleket basshysynyń sheshimi boıynsha ulttyq aýqymdaǵy áleýmettik mańyzy bar jobalardy iske asyrýǵa Ulttyq qordan 2023 jyly 1 trln teńge jáne 2024 jyly 400 mlrd teńge kóleminde nysanaly transfert tartý josparlanýda», -dedi mınıstr.