2025 jyly elimizde 4 myń MVt jańartylatyn energııa óndiriledi
NUR-SULTAN. QazAqparat – 2025 jyly elimizde 4 myń MVt jańartylatyn energııa óndiriledi. Bul týraly QR Premer-Mınıstriniń orynbasary Roman Sklıar aıtty, dep habarlaıdy QazAqparat tilshisi.
«Elektr energııasyn tutynýdyń ósýin eskere otyryp, ekologııalyq manevrlik qýattardy damytý memlekettiń energetıkalyq qaýipsizdigin qamtamasyz etýdiń qajetti sharty sanalady. Úkimet «Samuryq-Qazynamen» birlesip, bý-gaz qondyrǵylaryn salý jobalary boıynsha birlesken jumys júrgizýde jáne 2026 jylǵa qaraı elimizdiń ońtústiginde shamamen 3 myń MVt qýattylyqty iske qosý kútilýde», - dedi ol Úkimet úıinde ótken baspasóz máslıhatynda.
Onyń atap ótýinshe, sońǵy jyldary álemdik tájirıbeni eskere otyryp, jańartylatyn energııa kózderi sektoryndaǵy ınvestıtsııalyq ahýaldy jaqsartý boıynsha naqty qadamdar jasaldy.
«Memleket ekonomıkany dekarbonızatsııalaýǵa baǵyttalǵan belsendi saıasat júrgizýde. Qazirgi ýaqytta elimizde shamamen 2 myń MVt jańartylatyn energııa óndiriledi. 2025 jylǵa qaraı bul kórsetkish 2 esege artyp, 4000 MVt quraıdy. Bul JEK úlesiniń 6 paıyzyn josparly maqsatty ındıkatormen qamtamasyz etedi», - dedi Roman Sklıar.
