2025 jyly aýyldarda balalarǵa arnalǵan 1 600 úıirme ashylady

NUR-SULTAN. QazAqparat – 2025 jylǵa qaraı aýyldarda balalarǵa arnalǵan 1 600 úıirme ashylady. Bul týraly Úkimet otyrysynda QR Mádenıet jáne sport mınıstri Aqtoty Raıymqulova aıtty, dep habarlaıdy QazAqparat tilshisi.

«Aýyl turǵyndary úshin zamanaýı, jaıly áleýmettik-mádenı jáne sporttyq orta qurý, aýyldy eldi mekenderde turatyn balalardyń shyǵarmashylyq jáne sporttyq áleýetin damytý mınıstrliktiń basty mindeti. Búginde aýyldyq jerde 6 myńnan astam mádenıet uıymy bar. Nur Otan partııasynyń saılaýaldy baǵdarlamasyn oryndaý jónindegi jol kartasy aıasynda «Jumyspen qamtý jol kartasy», «Aýyl – el besigi» baǵdarlamasy, jergilikti bıýdjet, jeke ınvestıtsııa tartý jáne memlekettik-jekeshelik áriptestik tetikterin paıdalaný esebinen 748 ınfraqurylymdyq joba iske asyrylady. Onyń ishinde 180 jańa mádenıet nysanynyń qurylysy men 568 nysanǵa jóndeý júrgiziledi», - dedi ol.

Aqtoty Raıymqulova Memleket basshysynyń 2020 jyly 1 qyrkúıektegi «Jańa jaǵdaıdaǵy Qazaqstan: is-qımyl ýaqyty» atty Qazaqstan halqyna Joldaýynda aıtylǵan tapsyrmasy aıasynda balalar men jasóspirimderdiń shyǵarmashylyq áleýetin damytý maqsatynda mınıstrlik balalar úıirmeleriniń qyzmetin jańartý boıynsha belsendi jumys istep jatqanyn aıtty.

«Búgingi tańda aýyldarda barlyǵy 12 000 shyǵarmashylyq úıirme jumys isteıdi. Onyń ishinde 115,2 myń bala shuǵyldanatyn balalar men jasóspirimderge arnalǵan 9 000 úıirme bar. Qosymsha shyǵarmashylyq úıirmeler ashý jáne balalar men jasóspirimderdiń sapaly bos ýaqytyn uıymdastyrý maqsatynda 2021 alǵash ret memlekettik shyǵarmashylyq tapsyrys engizildi. 2025 jylǵa deıin respýblıka boıynsha qosymsha aýyldyq eldi mekenderde qosymsha 1600 úıirme ashylady. Nátıjesinde qosymsha 42 myń bala memlekettik shyǵarmashylyq tapsyryspen qamtylady jáne balalar men jasóspirimderge arnalǵan shyǵarmashylyq úıirmeler sany 10 600-ge jetedi», - dedi mınıstr.