2025 jylǵa qaraı munaı-gaz hımııasynyń óndirisi 2 mln tonnaǵa jetedi – Sklıar
QR Premer-Mınıstriniń orynbasary Roman Sklıar depýtattyq saýalǵa bergen jaýabynda munaı-gaz hımııasy ónimderiniń óndirisi 2 mln tonnaǵa deıin artatynyn aıtty.
«Búginde elimizde jylyna shamamen 870 myń tonna munaı-gaz hımııasy ónimderin shyǵaratyn 5 zaýyt jumys isteıdi. Sońǵy 4 jylda óndirilgen ónim kólemi 4 esege ósip, 360 myń tonnany qurady. Onyń 80% eksporttaldy. Sonymen qatar, jumys istep turǵan zaýyttardyń 100% jobalyq qýatyna shyǵýy, 2021 jyly 3 zaýyttyń qurylysyn aıaqtaý josparlanǵan», - dep jazdy vıtse-premer.
Onyń aıtýynsha, 2025 jylǵa qaraı áleýetti taǵy 2 jobany iske asyrý kózdelgen. Naqtyraq aıtsaq, jylyna 430 myń tonna polıetelentereftalat óndiretin jáne jylyna 130 myń tonna metanol óndiretin zaýyttar ashý josparlanyp otyr. Atlaǵan jobalar 2025 jylǵa qaraı munaı-gaz-hımııa óndirisiniń kólemin 2 mln tonnaǵa deıin ulǵaıtýǵa múmkindik beredi. Bul 2020 jylǵy kórsetkishtermen salystyrǵanda 5,5 ese artyq.
«Sondaı-aq, josparlanǵan jobalardyń off-take kelisimsharttary bar ekenin atap ótken jón. Bul ınvestorlardy tańdaý kezindegi krıterıılerdiń biri bolyp tabylady. Jalpy, Qazaqstanda shyǵarý josparlanǵan munaı-gaz hımııasy ónimine turaqty álemdik suranys bar ekenin IHS, McKinsey jáne BCG sııaqty birneshe álemdik agenttik rastap otyr», - delingen jaýapta.
Sarapshylardyń boljamy boıynsha, 2030 jylǵa qaraı polıpropılenge suranys jylyna shamamen 100 mln tonnaǵa jetýi múmkin.
«Qoldanystaǵy jáne iske qosylatyn qýattardy eskere otyryp, álemdegi usynys jylyna 90 mln tonna bolady. Polıetılenge álemdik suranys jylyna orta eseppen 4% ósip, jylyna 160 mln tonnaǵa jetedi. Álemdik suranystyń ósý draıveri Ońtústik Shyǵys Azııa elderi, onyń ishinde Qytaı, Koreıa, Japonııa bolady. Tek Qytaıda ǵana polıpropılen men polıetılenge suranys 2037 jylǵa deıin 40 mln tonnaǵa artady», - dep túıindedi Roman Sklıar.
