2025 jylǵa qaraı Qazaqstanda bilikti mamandar tapshylyǵy seziledi

NUR-SULTAN. QazAqparat - 2025 jylǵa qaraı kadr qajettiligi 570 myń adamnan asady. Bul týraly búgin XII AEF aıasyndaǵy Halyqaralyq eńbek uıymynyń 100 jyldyǵyna arnalǵan konferentsııada Eńbek jáne halyqty áleýmettik qorǵaý mınıstri Berdibek Saparbaev aıtty, dep habarlaıdy QazAqparat tilshisi.

Onyń aıtýynsha, Eńbek jáne halyqty áleýmettik qorǵaý mınıstrligi jahandyq syn-qaterlerdi jáne elde bolyp jatqan úrdisterdi eskere otyryp, Qazaqstannyń bolashaq eńbek naryǵy týraly paıymyn ázirlegen. 2025 jylǵa qaraı halyq sany 19,8 mln-ǵa deıin jetip, 1,6 mln-ǵa ósedi degen boljam bar. Jumys kúshiniń sany 6,7 paıyzǵa kóbeıip, 9,8 mln adamdy quraıtyn bolady.

«Ekonomıkanyń tehnologııalyq jańǵyrýyn eskere otyryp, 2025 jylǵa qaraı kadr tapshylyǵy 570 myńnan astam adamdy quraıdy. Orta jáne joǵary biliktilikti qajet etetin jumys oryndarynyń sany 766 myńǵa ulǵaıady dep boljanýda. Tómen biliktilikti qajet etetin eńbekke suranys qysqarady. Ekonomıkanyń dástúrli salalaryn jańǵyrtý esebinen osyndaı jumys oryndarynyń sany 530 myńǵa azaıady», - dedi B.Saparbaev.

Sonymen qatar ol eńbek ónimdiligi ósý aıasynda jumys kúshiniń aýyl sharýashylyǵynan bilim berý, qurylys, kólik, saýda jáne basqa da qyzmetter sııaqty anaǵurlym ónimdi salalarǵa aýysýy baıqalatynyn aıtty.