2025 jylǵa qaraı aýyldarda 24 mln sharshy metr turǵyn úı paıdalanýǵa beriledi
«Nur Otan» partııasynyń «Ózgerister joly: árkimge laıyqty ómir!» baǵdarlamasyn oryndaý jónindegi jol kartasyn iske asyrý aıasynda bizge aýyldyq jerlerdegi ómir sapasyn arttyrý mindeti qoıylyp otyr. Aýyl turǵyndarynyń turmys sapasyn arttyrý úshin eń aldymen ınfraqurylymdy jańǵyrtý jumysy júrgizilýde. 2025 jylǵa deıin jergilikti mańyzy bar 27 myń shaqyrym jol salynyp, jóndeledi. Aýyldarda 24 mln sharshy metr turǵyn úı paıdalanýǵa beriledi», - dedi Úkimet basshysy.
Onyń atap ótýinshe, agroónerkásipti keshen salasynda 845 joba iske asyrylyp, 500 myń jumys orny qurylady. 7 ekojúıe qurylyp, 350 myń fermer men úı qojalyqtary tartylady.
«Qabyldanatyn sharalar aýyl turǵynynyń tabysyn arttyrýǵa múmkindik beredi. Aýyl turǵyndarynyń 100 paıyzy sapaly aýyz sýmen jáne 60 paıyzy tabıǵı gazben qamtamasyz etiledi. Densaýlyq saqtaý salasynda bes jyl ishinde 1 095 nysan jóndeýden ótkiziledi jáne salynady. Bul halyqty medıtsınalyq qyzmet kórsetýmen qamtýdy 2 ese ulǵaıtýǵa múmkindik beredi. 5 jyl ishinde 5 myń mektep jańǵyrtylyp, 315 aýyl mektebi salynady», - dedi Asqar Mamın.
Premer-Mınıstr aýyl oqýshylaryn qosymsha bilimmen barynsha qamtý jáne bilim sapasynyń qala men aýyl arasyndaǵy aıyrmasyn qysqartý jumysy júrgizilip jatqanyn aıtty.
«748 mádenıet men 1 719 sport nysany jóndeledi jáne salynady. Jalpy, aýyldyq eldi mekenderdi damytý boıynsha 5 jylǵa arnalǵan naqty jospar ázirlengen. 2021 jyldyń ózinde «Aýyl el besigı» jobasyn júzege asyrý aıasynda 105 mlrd teńge bólindi, ol 1,3 mln adam turatyn 480 aýyldy jańǵyrtýǵa múmkindik beredi. Bes jyldyń ishinde 800 mlrd teńge bólinedi. Jol, ınjenerlik jáne áleýmettik ınfraqurylym jaqsartylady. Bul 7 mln aýyl turǵyndarynyń ómir sapasyn jaqsartýǵa múmkindik jasaıdy. Bul jospardyń iske asyrýdaǵy basty maqsat – ár aýyl turǵynynyń ómir sapasynyń jaqsartý», - dedi Úkimet basshysy.
