2025 jylǵa qaraı Astana mektepterine 7120 muǵalim qajet bolady

ASTANA. QazAqparat – Elordada «Jaıly mektep» ulttyq jobasynyń aıasynda salynatyn mektepterge 7120 muǵalim qajet bolady. Bul jaıynda qalalyq bilim basqarmasynyń basshysy Qasymhan Senǵazyev óńirlik kommýnıkatsııalar qyzmetinde ótken brıfıngte málim etti dep habarlaıdy QazAqparat tilshisi.

«Elordanyń orta bilim berý júıesiniń kadrlyq qurylymynda 13 903 muǵalim bar. Onyń 62 paıyzy pedagogıkalyq attestattaý qorytyndysy boıynsha jańa formattaǵy biliktilik sanattaryn aldy. Qazir olardyń negizgi jalaqylaryna 30 paıyzdan 50 paıyzǵa deıin qosymsha aqy tólenedi.

Jańa mektepterdiń qurylysyna baılanysty, onyń ishinde «Jaıly mektep» ulttyq jobasy aıasynda elordada 7120 muǵalimge qajettilik týyndaıdy», - dedi Qasymhan Senǵazyev.

Sondaı-aq, ol 2029 jylǵa deıin pedagogıkalyq mamandyqtar boıynsha stýdentterdi daıarlaýǵa 7350 orynnyń memlekettik tapsyrys belgilengenin aıtty.

Al tehnıkalyq jáne kásiptik bilim berý uıymdarynda 10350 orynǵa bilim berý tapsyrysyn ornalastyrý josparlanyp otyr.