2025 jylǵa qaraı 5 myń aýyl mektebine jańǵyrtý júrgizý josparlanýda
«Qazirgi ýaqytta elimizde bir jarym mıllıon oqýshysy bar 5 268 aýyldyq mektep jumys isteıdi. Aýyldyq mektepterde 182 myń muǵalim sabaq beredi. Al, shaǵyn jınaqty mektepter sany – 2 757, bul barlyq mektepterdiń jalpy sanynyń 37 paıyzy. Aýyl mektepterin damytý, olardyń bilim sapasyn arttyrý – eń mańyzdy baǵyttardyń biri», - dedi ol.
Mınıstrdiń aıtýynsha, PISA Halyqaralyq zertteýlerdiń nátıjeleri bir jaǵynan qala jáne aýyl mektepteriniń arasyndaǵy aıtarlyqtaı alshaqtyqty, al ekinshi jaǵynan óńirler arasyndaǵy alshaqtyqty kórsetip otyr.
Mysaly, Qaraǵandy álde Qostanaı oblystaryndaǵy aýyl men qala mektepteriniń arasyndaǵy sapa boıynsha aıyrmashylyq úlken bolǵanmen, biraq osy oblystyń sapa boıynsha qala mektepterinen áldeqaıda tómen bolǵan aýyl mektepteriniń kórsetkishi basqa segiz oblystardyń qala kórsetkishterinen joǵary. Al, óz kezeginde sapa boıynsha aıyrmashylyǵy eń az Aqtóbe oblysynda qalanyń da, aýyldyń da mektepterindegi bilim berý sapasy birdeı joǵary emes ekenin kórýge bolady», - dedi Ashat Aımaǵambetov.
Onyń atap ótýinshe, jalpy bul taldaý bilim sapasynyń tıisti jaǵdaıdyń jasalýyna tikeleı baılanysty ekenin kórsetedi.
«Sondyqtan aýyl mektepterin damytý úshin keshendi is sharalar qabyldanýda. Birinshiden, bilim berý sapasyn jaqsartý úshin 2025 jylǵa qaraı 5 000 aýyldyq mektepke jańǵyrtý júrgizý josparlanýda. Bul degenimiz – jóndeý jumystary, pán kabınetterimen, arnaıy jıhazdarmen, kompıýterlermen jabdyqtaý, ashanalar men kitaphanalardy jańartý tetikteri boıynsha iske asyrylatyn bolady. Ár oblys pen ár mektep boıynsha naqty jospar bekitildi. Onyń ishinde, 2021 jyly 1 015 mektep jańǵyrtylady. 2025 jylǵa qaraı aýylda 315 jańa mektep, sonyń ishinde 2021 jyly 83 mektep salý josparlanyp otyr», - dedi Ashat Aımaǵambetov.
