2025 jylǵa deıin Túrkistan oblysy gazben 99 paıyz qamtylady - Ómirzaq Shókeev
«Qazirgi tańda oblystyń 1 mln 152 myń turǵyny bar eldi mekenderi tabıǵı gazben qamtamasyz etilgen. Bıyl 43 nysannyń qurylysy júrdi. Onyń 20-sy aıaqtaldy, 23-i kelesi jylǵa ótpeli. Túrkistan oblysyn damytýdyń 2025 jylǵa deıingi keshendi jospary bar. Sol josparda 2025 jylǵa deıin eldi mekenderdi 99 paıyz gazben qamtamasyz etý josparlanǵan. Kelesi jylǵa Energetıka mınıstrligimen birlesip, bıýdjettik ótinim usynyldy. 4,3 mlrd teńgege 7 nysandy gazdandyrý qarastyrylǵan. Taǵy 52 nysandy gazdandyrýǵa daıynbyz. Sondyqtan bul qurylystardy bastaýǵa taǵy qarjy kerek bolady. Oǵan qosymsha ótinim jasaımyz», - dedi oblys basshysy.
Sonymen qatar ol óńirdegi gaz qubyrlary «QazTransGaz» AQ-qa senimgerlik basqarýǵa berilip jatqanyn aıtty.
«Qazirgi ýaqytta qurylysy bitken 298 nysannyń 110-y qazan aıynda senimgerlik basqarýǵa berýge daıyn bolǵan edi. Onyń 30 berildi. Búginde 140 nysan daıyn tur. Qalǵan 84 nysan problemaly bolatyn. Jyldyń sońyna deıin olardyń qujattaryn daıyndap beremiz. Energetıka mınıstrligimen birge jumys istep jatyrmyz. Tapsyrmany oryndaýǵa tolyq múmkinshilik bar», - dedi Ómirzaq Shókeev.
