2025 jylǵa deıin kólik joldarynyń 85% tolyq jóndeledi
ASTANA. QazAqparat - 2025 jylǵa deıin respýblıkalyq jáne jergilikti mańyzy bar avtojoldardyń 85%-na tolyq jóndeý jumystary júrgiziledi. Bul týraly QR Investıtsııalar jáne damý vıtse-mınıstri Roman Sklıar málim etti, dep habarlaıdy QazAqparat tilshisi.
«Jyl saıyn 4 myń shaqyrymnan asa avtomobıl joldaryn jóndeý josparlanýda. Sóıtip, 2025 jylǵa deıin respýblıkalyq jáne jergilikti mańyzy bar avtojoldardyń 85%-na tolyq jóndeý jumystary júrgiziletin bolady», - dedi Roman Sklıar.
Onyń aıtýynsha, atalǵan jumystardy atqarý maqsatynda aldaǵy jylǵa 158 mlrd teńge qarastyrylǵan, onyń 90,4 mlrd teńgesi respýblıkalyq bıýdjetten bólinedi. Ol qarajattyń 25,0 mlrd teńgesi jańa avtojoldar salý jáne qaıta jóndeýge jumsalsa, qalǵan 65, 4 mlrd teńge kúrdeli jáne ortasha deńgeıdegi jóndeý jumystaryna baǵyttalady.
Sonymen qatar, vıtse-mınıstr respýblıkalyq mańyzy bar qala joldarynyń da nazardan tys qalmaıtynyn aıta kele, ol úshin aǵymdaǵy jyly 56,6 mlrd teńge bólingenin jetkizidi. Atap aıtqanda, Astana- 38,5 mlrd teńge, Almaty- 56,6 mlrd teńge, Shymkent - 0,5 mlrd teńge.
Odan bólek, R.Sklıar 2020 jylǵa qaraı elimizdegi aqyly joldardyń jalpy uzyndyǵy 6,7 myń shaqyrymdy quraıtynyn, ol óz kezeginde qazynaǵa 30 mlrd teńge túsiretinin tilge tıek etti.
Aıta ketsek, búgin Astanada óńirlerdegi jol qurylystaryn damytý máseleleri talqylandy.
