2025 jylǵa deıin elektr energııasy profıtsıti bolady - Energetıka mınıstrligi
NUR-SULTAN. QazAqparat - Sońǵy 10 jylda elektr energııasyn tutyný kórsetkishinde eleýli ósim boldy. Bul týraly Parlament Májilisindegi Úkimet saǵatynda Energetıka mınıstri Qanat Bozymbaev málim etti, dep habarlaıdy QazAqparat tilshisi.
«2008-den 2018 jyl aralyǵy kezeńinde elektr energııasyn tolyq tutyný ósimi elimizde 28 paıyzdy nemese 22,6 mlrd kVtsaǵ-ty qurady (2008 jyldaǵy 80,6 mlrd kVtsaǵ-tan 2018 jylǵy 103,2 mlrd kVtsaǵ-qa deıin). Atalǵan kezeńde elektr energııasyn tutyný kóleminiń artýy ekonomıkanyń qarqyndy ósiminiń aıasynda oryn aldy», - dedi mınıstr.
Onyń atap ótýinshe, energııany paıdalaý qarqyny negizinen ónerkásiptik óndiristi damytýǵa baılanysty. Búginde energııany tutynýdyń jalpy kóleminde onyń úlesi 55 paıyzdy qurady.
Sonymen qatar Q. Bozymbaev bıyldyń basynda Energetıka mınıstrligi tarapynan 2019-2025 jyldarǵa arnalǵan jeti jyldyq boljam balansy bekitilgenin eske saldy.
«Balans málimetterine sáıkes, eski energetıkalyq qýattardy shyǵarý men jańalaryn iske qosýdy eskere otyryp, 2025 jylǵa deıin elektr energııasy men qýatynyń profıtsıti bolatyny boljanyp otyr. Boljamdyq balansqa súıensek, 2025 jyly elektr qýatyn tutyný 18 260 MVt deńgeıinde eskerilgen (2018 jylǵy faktige qaraǵanda ósim 3 566 MVt)», - dedi Qanat Bozymbaev.
Onyń aıtýynsha, elektr qýatyna suranysty qamtamasyz etý úshin boljamdyq balansta qoldanystaǵy stansalarda 3 567 MVt kóleminde qosymsha qýatty iske qosý eskerilgen. Sonymen qatar, bul baǵytta jańa stansalardy salý, onyń ishine 1 269 MVt qýatyndaǵy jańaratyn energııa kózderi nysandarynyń qurylysyn iske asyrý qarastyrylyp otyr.
