2025 jylǵa deıin Ekibastuz qalasynda 2 mádenıet úıi salynady

NUR-SULTAN. QazAqparat –2025 jylǵa deıin Ekibastuz qalasynda 20 mektep kúrdeli jóndeýden ótip, 350 oryndyq balalar shyǵarmashylyq úıi boı kóteredi, dep habarlaıdy QazAqparat tilshisi.

Búgingi Úkimet otyrysynda QR Ulttyq ekonomıka mınıstri Áset Erǵalıev osylaı dep málim etti.

Onyń sózinshe, keshendi jospar boıynsha shahardyń densaýlyq saqtaý jáne bilim berý qyzmetteriniń qoljetimdiligi men sapasyn arttyrý úshin zamanaýı ınfraqurylym qurý mindeti qoıylyp otyr.

«Densaýlyq saqtaý salasyndaǵy materıaldyq-tehnıkalyq baza nyǵaıtylady. 350 oryndyq balalar shyǵarmashylyǵy ortalyǵyn salý, 20 mektepti kúrdeli jóndeýden ótkizý, 320 oryndyq balabaqshany qaıta jańartý kózdelip otyr.

Mádenıet jáne sport salasyn damytýǵa «Isabek Ishan Hazret» murajaıy, 2 mádenıet úıi, muz arenasy, 20 strıt-vorkaýt jáne 10 strıtbol alańdary salynady», - dedi vedomstvo basshysy.

Mınıstrdiń sózine qaraǵanda, qala aýmaǵynda 2 órt sóndirý deposy salynyp, qoldanystaǵy 2 depo jóndelmek.