2025 jylǵa deıin densaýlyq saqtaý salasyna 28 trln teńge jumsalady
NUR-SULTAN. QazAqparat - 2025 jylǵa deıin densaýlyq saqtaý salasyna 28 trln teńge jumsalady, dep habarlaıdy QazAqparat tilshisi.
Bul týraly QR Densaýlyq saqtaý mınıstrliginiń jaýapty hatshysy Botagóz Jaqsylyqova aıtyp berdi.
«2020-2025 jyldary densaýlyq saqtaý salasyn damytý memlekettik baǵdarlamasynda 2025 jylǵa deıin densaýlyq saqtaý shyǵyndaryn JІÓ 5% deıin jetkizý qarastyrylǵan. 2019 jyldan 2025 jylǵa deıingi densaýlyq saqtaýdyń jalpy shyǵyndary 28 trln teńgeni quraıdy. Onyń 13 trln teńgesi nemese 47% memlekettik bıýdjetten, MÁMS aktıvteriniń shyǵysy - 3 trln teńge nemese 11%, halyqtyń shyǵysy - 11,8 trln teńge», - dedi B. Jaqsylyqova QR Parlamenti Senatynda ótken jınalysta.
Buǵan deıin jaýapty hatshy qazaqstandyq dárigerlerdiń ortasha jalaqysy týraly aıtyp bergen edi.
