2025 jylǵa deıin dárigerlerdiń jalaqysy jyl saıyn kóteriledi – Birtanov
«Mindetti áleýmettik medıtsınalyq saqtandyrýdy engizýdiń nátıjesinde qańtardan bastap dárigerlerdiń jalaqysy 30, meıirbıkelerdiń jalaqysy 20 paıyzǵa kóterildi. Bul kópten kútken óte mańyzdy nátıje sanalady. 2019 jyldyń qańtaryn qosa eseptesek dárigerleriń jalaqysy 60 paıyzǵa kóterildi. Biz bul jumysty ári qaraı jalǵastyramyz. 2025 jylǵa deıin memlekettik baǵdarlama negizinde jyl saıyn medıtsına salasy qyzmetkerleriniń jalaqysy kóterilip otyrady», - dedi Eljan Birtanov.
Mınıstr densaýlyq saqtaý salasyn kadrmen qamtamasyz etý máselesine de toqtalyp ótti.
«Shyndyǵyn aıtý kerek, qazirgi kúni elimizde dárigerlerdiń jáne orta býyn meıirbıkelerdiń sany jetkilikti dep aıtýǵa bolady. Basqa damyǵan memleketterden kóp aıyrmashylyǵy joq. Sonymen qatar aýyldyq jerlerdegi medıtsınalyq qyzmetkerlerdiń sany óte tómen. Jeke sektorǵa dárigerlerdiń aýysýy da baıqalady. Ol túsinikti de. Qazirgi ýaqytta dárigerlerdiń 21 paıyzy jeke sektorda jumys isteıdi. Jalpy, bul jaıt aldaǵy ýaqytta ulǵaıa túsedi dep kútemiz», - dedi ol.
Eljan Birtanovtyń aıtýynsha, elimizde 4 myńnan astam dáriger jetispeıdi. Degenmen, medıtsınalyq ýnıversıtetterde qajetti mamandar daıyndalyp jatyr. Máselen, bıyl 8 myńǵa jýyq adam medıtsınalyq ýnıversıtetterdi bitiredi. Olardyń arasynda 5 700-ge jýyq dáriger memlekettik tapsyrys aıasynda bilim alyp shyǵady.
«Árıne, qazirgi qoldanystaǵy zańǵa sáıkes, bul dárigerler mindetti túrde 3 jylǵa óńirlerge jiberiledi»,- dedi mınıstr.