2025 jylǵa deıin aýyldarda 655 densaýlyq nysany salynady
««Halyq densaýlyǵy jáne densaýlyq saqtaý júıesi týraly» Kodekste aýyldyq densaýlyq saqtaý deńgeıinde medıtsınalyq-sanıtarııalyq alǵashqy jáne mamandandyrylǵan medıtsınalyq kómektiń qoljetimdiligin qamtamasyz etý úshin kóshpeli medıtsınalyq keshender, medıtsınalyq poıyzdar jáne qashyqtan medıtsınalyq qyzmet kórsetý quraldary paıdalanylatyny aıqyndalǵan. El turǵyndarynyń 40 paıyzy aýyldyq jerlerde turatynyn eskere otyryp, Úkimet aýyl turǵyndaryn sapaly medıtsınalyq kómekpen qamtamasyz etý úshin «Aýyldyq densaýlyq saqtaýdy jańǵyrtý» pılottyq ulttyq jobasyn qabyldady. Osy joba aıasynda 2023-2025 jyldary 655 medıtsınalyq-sanıtarııalyq alǵashqy kómek nysany salynady. Joǵary tehnologııalyq medıtsınalyq kómek kórsetý úshin kópbeıindi 32 aýdandyq aýrýhana jańǵyrtylady», - dep atap ótedi Úkimet basshysy jaýabynda.
Onyń atap ótýinshe, halyqtyń joǵary bilikti medıtsınalyq kómekke qoljetimdiligin keńeıtý úshin Densaýlyq saqtaý mınıstrligi telemedıtsınany damytýdyń 2022-2025 jyldarǵa arnalǵan is-sharalar josparyn ázirlegen. Onda elimizdiń barlyq aýmaǵynda telemedıtsınalyq sheshimder jobalaryn iske qosý kózdelgen.
«Sondaı-aq jańa tarıfterdi qaıta qaraý jáne qalyptastyrý tegin medıtsınalyq kómektiń kepildik berilgen kólemi aıasynda jáne aýdandyq, aýdanaralyq deńgeıde statsıonarlyq jaǵdaılarda mamandandyrylǵan kómekti qarjylandyrý boıynsha usynystar daıyndaý jónindegi is-sharalar kózdelgen mindetti áleýmettik medıtsınalyq saqtandyrý júıesinde kórsetiletin medıtsınalyq qyzmetterge tarıfterdi qalyptastyrý jónindegi jumys jospary negizinde júzege asyrylatynyn atap ótken jón», - dedi Álıhan Smaıylov.
