2025 jylǵa deıin Almatyda 10 taý shańǵysy kýrortyn salý josparda bar
ALMATY. QazAqparat - Almatyda taý týrızmin damytý maqsatynda 2025 jylǵa deıin taǵy 10 kýrort salý josparda bar. Bul týraly qalalyq Týrızm basqarmasy basshysynyń orynbasary Qalıbek Asylbekov aıtty, dep habarlaıdy QazAqparat tilshisi.
Onyń aıtýynsha, taý shańǵysy týrızmin damytý boıynsha 2025 jylǵa deıin Almaty jáne Almaty oblysynda úsh klasterdiń damýy kórsetilgen.
«Byltyr avstrııalyq kompanııa Almaty qalasy jáne Almaty aglomeratsııasynda taý shańǵysy týrızmi klasterin damytý josparyn jasady. Qazirgi tańda zertteý jumystaryn júrgizip jatyrmyz. Shyǵys klasterine Túrgen taýlary kiretin boldy. Ortalyq klasterge Almaty terrıtorııasy kirdi. Batys klaster boıynsha Qaskeleń damıtyn boldy. Osy úsh klasterdiń terrıtorııasynda uzyndyǵy 456 shaqyrym bolatyn shańǵy trassasy salynyp, 10 taý kýrorty salynady. Bul qazirgi kólemnen 8 ese artyq. Sondyqtan, biz taý shańǵysy týrızmin damytýǵa barynsha ekpin berip otyrmyz. Medeý men Shymbulaq kýrorttaryna byltyr 600 myń týrıst barǵan», - dedi KITF 2019 kórmesiniń ashylý saltanatynda qalalyq Týrızm basqarmasy basshysynyń orynbasary Qalıbek Asylbekov.
Onyń aıtýynsha, Almatynyń taý shańǵysy týrızmin damytýǵa múmkindigi mol.
«QR Qorǵanys mınıstrligimen TsSK taý shańǵysy bazasyn kommýnaldy menshikke berý týraly kelisimge keldik. «Suńqar» kesheninde de taý týrızminiń potentsıaly bar. Infraqurylymy tar bolǵanymen byltyr munda 7,5 myń adam kelgen. Biz taý shańǵysy silemderin 2,5 shaqyrymǵa uzartýdy kózdep otyrmyz. Qazir onda 200 metr bar. Odan bólek Qaskeleń de taý shańǵysy kongolmeratyna kiredi. Ol jaqtyń taý silemderinde 110 shaqyrymdyq trassa paıda bolady. Túrgen shatqalynda 150 km trassa salynady», - dedi ol.
Qazir bul joba boıynsha tehnıkalyq ekonomıkalyq negizdeme, jobalyq-smetalyq qujattama jasalyp jatyr.
Investıtsııalar jekemenshik ınvestorlardan nemese memlekettik bıýdjetten tartylady.
Barlyq qujattardy sáıkestendirý kezinde taý shańǵysy kýrortynyń qurylysy 3 jylǵa sozylýy yqtımal.
Qalalyq Týrızm basqarmasy basshysynyń orynbasary Qalıbek Aqylbekov «Kókjaılaý» jobasyna qatysty pikirin bildirdi.
«Kókjaılaý boıynsha qoǵamdyq tyńdaý ótti. Oǵan 525 adam keldi, 80 adam qarsylyq bildirdi. Oǵan deıin de saýalnama júrgizgende 80% halyq Kókjaılaý qurylysyn qoldaǵan bolatyn. Adamdar qarsylyq bildiretin sebebi, olar bul jerde ne bolatynyn bilmeıdi. Bul taý shańǵysy kýrortyn damytý úshin keremet joba. Biraq joba keıinge qaldyryldy», - dedi Qalıbek Asylbekov.
Aıta ketý kerek, munyń aldynda Baýyrjan Baıbek Kókjaılaý kýrortynyń qurylysyn keıinge qaldyrýdy usynǵan bolatyn.
