2025 jylǵa deıin 757 MVt bolatyn jańartylatyn energııa kózderiniń 41 jobasy iske qosylmaq
Bul týraly Senatta «Tıimdi óńirlik saıasat – elimizdiń ornyqty áleýmettik-ekonomıkalyq damýynyń negizi» taqyrybyndaǵy parlamenttik tyńdaýda Premer-Mınıstrdiń birinshi orynbasary Roman Sklıar málim etti, dep habarlaıdy QazAqparat tilshisi.
«Elimizde energııa kózderiniń qýatyn arttyrý is-sharalary júrgizilip jatyr. Byltyr alǵash ret jańa stantsııalar salý boıynsha aýktsıondar ótkizildi. 2026 jylǵa qaraı Almaty, Qyzylorda Túrkistan jáne Ulytaý oblystarynda jalpy 1700 MVt qýaty bar ıkemdi generatsııa kózderi paıda bolady. Sonymen qatar, 1300 MVt-tan astam qosymsha qýatpen jumys istep turǵan elektr stantsııalaryn jańǵyrtý boıynsha ınvestıtsııalyq kelisimder qolǵa alyndy», - dedi R. Sklıar.
Onyń aıtýynsha, zamanaýı tehnologııalardy engize otyryp, Ekibastuzdyń jańa GRES-3 qurylysynyń jol kartasy ázirlendi. «Samuryq-Energo» Ekibastuz GRES-2-de qosymsha energobloktar salý jobasy júzege asyryp jatyr. Sonymen qatar, Aqsý GRES-in keńeıtý josparlanyp otyr.
«Byltyr jalpy qýaty 385 MVt bolatyn jańartylatyn energııa kózderiniń 12 nysany iske qosyldy. Bıyl 276 MVt jańartylatyn energııa kózderiniń 15 nysany iske qosylady. Nátıjesinde, jańartylatyn energııa kózderin óndirý úlesi 5 protsentke deıin óspek. 2025 jylǵa deıin qýaty 757 MVt bolatyn jańartylatyn energııa kózderiniń 41 jobasyn paıdalanýǵa berý josparda bar», - dedi Úkimet basshysynyń birinshi orynbasary.
Onyń sózine qaraǵanda, Memleket basshysynyń tapsyrmasy aıasynda barlyq jylý elektr stantsııalary men elektr jelilerine revızııa júrgizilip jatyr. Bul tekserý bıyldyń birinshi toqsanynda aıaqtalady. Tekserý qorytyndysy boıynsha tıisti is-sharalar jospary qabyldanady.
«Sonymen qatar aýqymdy jóndeý naýqanyna daıyndalyp jatyrmyz. Menshik ıeleriniń jaýapkershiligi qaıta qaralyp baqylaý-qadaǵalaý fýnktsııalary men salanyń jalpy tıimdiligin kúsheıtýge ekpin qoıyldy. Arnaıy komıssııa tez arada jańǵyrtýdy qajet etetin 19 problemaly jylý elektr ortalyǵyn anyqtady. Memleket basshysynyń tapsyrmasy boıynsha Kókshetaý jáne Semeı qalalarynda jańa jylý elektr stansalaryn salý, Pavlodar men Ekibastuzdaǵy jylý elektr stantsııalaryn jańǵyrtý jumystary atqarylyp jatyr», - dedi R. Sklıar.
