2025 jylǵa deıin 4,7 trln teńgeniń ındýstrııalyq jobalary iske asyrylady

NUR-SULTAN. QazAqparat – Álemdik ekonomıka jáne saıasat ınstıtýtynyń sarapshysy Arman Toqtyshaqov «Jańa Qazaqstan» modeli syrtqy syn-qaterlerge qanshalyqty beıim ekeni týraly pikir bildirdi, dep habarlaıdy QazAqparat tilshisi.

«Qazaqstan Prezıdenti Qasym-Jomart Toqaev qańtar aıynyń basynda «Jańa Qazaqstan» tujyrymyn jarııalap, qordalanǵan áleýmettik-ekonomıkalyq problemalardy sheshýge baǵyttalǵan birqatar sharany belgiledi.

Mundaǵy ekonomıkalyq reformalardyń asa mańyzdy baǵyttarynyń biri júıeli ındýstrııalandyrý jáne jańa jumys oryndaryn qurý sharalaryna baǵyttalyp otyr.

Halyqaralyq tájirıbe kórsetip otyrǵandaı, qýatty óndiristik sektor ekonomıkanyń turaqty damýyna tirek bola alady. Óndiristi keńeıtý arqyly, sonyń ishinde sapaly jumys oryndaryn qurý mindeti sheshilýi kerek», - dedi sarapshy.

Ekonomıst ındýstrııalyq saıasatty kúsheıtý Qazaqstan ekonomıkasynyń shıkizat eksportyna táýeldiligin tómendetip qana qoımaı, syrtqy ekonomıkalyq syn-tegeýrinderge tózimdi ete túsetinin aıtady.

«Qazirgi pandemııa jaǵdaıynda ishki óndiristiń úlesin arttyrý epıdahýaldyń teris saldaryn tıimdi eńserýge yqpal etedi. Prezıdenttiń tehnıkalyq mamandardy daıarlaýǵa basymdyq berip otyrǵany kezdeısoq emes. Ol úshin Qazaqstanda álemniń jetekshi tehnıkalyq ýnıversıtetteriniń fılıaldaryn ashý tapsyryldy.

Resmı derek boıynsha, 2021 jyly ónerkásip óndirisiniń kólemi 3,8%, onyń ishinde óńdeý ónerkásibi 5,5% ósti. Shıkizattyq emes sektorlarda ınvestıtsııalyq belsendilik joǵary bolyp, oń ózgeristerdiń sheshýshi faktoryna aınaldy», - deıdi Arman Toqtyshaqov.

Ekonomıst memleket ındýstrııalandyrý saıasatynan túbegeıli bas tartpaǵanyn, kerisinshe, ony zaman talabyna saı qaıta ózektilendirgenin aıtady.

«Indýstrııalandyrýdy ári qaraı damytý sheńberinde Úkimet quny 4,7 trln teńgeden asatyn 254 jobany iske asyrýdy kózdep otyr. Osy jobalardy oryndaý arqyly 2025 jylǵa qaraı 46 myńnan astam turaqty jumys orny qurylady dep josparlanýda.

Metallýrgııa, mashına jasaý jáne qurylys salasyndaǵy iri kásiporyndardyń tóńireginde shaǵyn jáne orta bıznesti damytýdyń keshendi baǵdarlamasy erekshe nazar aýdarýǵa turarlyq. Bul baǵdarlama ındýstrııalyq saıasattyń mańyzdy elementi bolýǵa jáne jappaı kásipkerlikti damytýǵa negiz qalaýǵa tıis.

Osylaısha, qýatty óndiristik sektorǵa basa nazar aýdara otyryp, ındýstrııany ártaraptandyrý ekonomıkadaǵy negizgi saıasatqa aınalmaq», - deıdi sarapshy.