2025 jylǵa deıin 33 mlrd teńgege toǵyz toptyq sý qubyry salynady

NUR-SULTAN. QazAqparat – 2025 jylǵa deıin 33 mlrd teńgege 9 toptyq sý qubyry salynady. Bul týraly búgin Úkimet otyrysynda QR Ekologııa, geologııa jáne tabıǵı resýrstar mınıstri Serikqalı Brekeshev aıtty, dep habarlaıdy QazAqparat tilshisi.

«Qýatty óńirler – el damýynyń draıveri» ulttyq jobasy aıasynda 2025 jylǵa deıin jalpy quny 33 mlrd teńge bolatyn 9 toptyq sý qubyryn salý jáne qaıta jańartý josparlanyp otyr. Jalpy, 2025 jylǵa qaraı shamamen 1,2 myń shaqyrym toptyq sý qubyry salynyp, 22,3 myń adamy bar 41 aýyldyq eldi meken sapaly aýyz sýmen qamtamasyz etiledi jáne 33 myń adam turatyn 52 aýyldyq eldi mekende sýmen jabdyqtaý jaqsartylady», dedi mınıstr.

Sóz sońynda Serikqalı Brekeshev eldi mekenderdi sapaly aýyz sýmen qamtamasyz etý jumystary mınıstrliktiń turaqty baqylaýynda turǵanyn basa aıtty.

Aıta keteıik, Úkimet otyrysynda QR Indýstrııa jáne ınfraqurylymdyq damý mınıstri Qaıyrbek Óskenbaev ta kóterilgen máselege qatysty baıandama jasap, 2025 jylǵa deıin el turǵyndary 100 paıyz sapaly aýyz sýmen qamtamasyz etiletinin aıtqan bolatyn.