2025 jyldan bastap kedeılik shegi ortasha tabys deńgeıi boıynsha esepteledi

ASTANA. QazAqparat – Elimizde kedeılik shegi jańa esepteý tártibi boıynsha aıqyndalmaq. Mundaı ózgeris Eńbek jáne halyqty áleýmettik qorǵaý mınıstriniń buıryǵynda jazylǵan, dep habarlaıdy QazAqparat tilshisi.

«2023 jyly 1 qańtardan bastap Qazaqstan Respýblıkasy boıynsha kedeılik shegi memlekettik ataýly áleýmettik kómek taǵaıyndaýǵa júgingen toqsannyń aldyndaǵy toqsanǵa eseptelgen eń tómen kúnkóris deńgeıiniń 70 paıyzy mólsherinde bekitilsin. 2025 jyly 1 qańtardan bastap memlekettik ataýly áleýmettik kómek taǵaıyndaýǵa júgingen toqsannyń aldyndaǵy toqsanǵa eseptelgen medıandyq tabysynyń (ortasha tabys - avtor) 50 paıyzy mólsherinde aıqyndalady», - delingen qujatta.

Buıryqqa sáıkes, qazir kedeılik shegi eń tómengi kúnkóris deńgeıiniń 70%-na teń. Demek, qazir kúnkóris deńgeıi 40 565 teńge bolsa, onyń 70 paıyzy – 28 397 teńge.

Eske salaıyq, buǵan deıin Eńbek jáne halyqty áleýmettik qorǵaý mınıstri Tamara Dúısenova kedeılik shegi ortasha tabys deńgeıi arqyly anyqtalatynyn málimdegen edi. Onyń aıtýynsha, bul ózgeristi engizý aldynda Ekonomıkalyq yntymaqtastyq jáne damý uıymynyń tájirıbesi zerdelengen. Osy uıymǵa enetin 8 memleket kedeılik shegin medıandyq tabys deńgeıi arqyly aıqyndaıdy.

Qosa keteıik, Ulttyq statıstıka bıýrosynyń málimetinshe, byltyr II toqsanda iriktemeli zertteý nátıjesi boıynsha kedeılik deńgeıi 5,1% bolǵan. Bul – 2021 jyldyń sáıkes kezeńimen salystyrǵanda 0,3 paıyzǵa joǵary.