2025 jyly zeınetaqynyń ortasha mólsheri 96 562 teńge bolady
ASTANA. KAZINFORM – 2025 jyly zeınetaqynyń ortasha mólsheri 96 562 teńge bolady. Bul týraly Úkimet otyrysynda Premer-mınıstrdiń orynbasary – Qarjy mınıstri Mádı Tákıev aıtty.
«Bıýdjet áleýmettik baǵytqa baǵdarlanǵan bolyp qala beredi. 2025 jyly áleýmettik salaǵa 2024 jylmen salystyrǵanda 794 mlrd teńgege ulǵaıyp 9,8 trln teńge baǵyttalady. Shyǵystardyń ósýine kelesi faktorlar áser etedi. Birinshi, ınflıatsııanyń ortasha deńgeıine áleýmettik tólemderdi ındeksteý: bazalyq zeınetaqy men járdemaqyny 6,5 paıyzǵa, ortaq zeınetaqyny ınflıatsııanyń ortasha deńgeıinen 2 paıyzǵa asyra otyryp, 8,5 paıyzǵa ındeksteý. Indeksteýge jáne áleýmettik tólemderdi alýshylar sanyn ulǵaıtýǵa qosymsha 626 mlrd teńge baǵyttalatyn bolady. Nátıjesinde 2025 jyly zeınetaqynyń ortasha mólsheri 96 562 teńge bolady», - dedi Mádı Tákıev.
Onyń dereginshe, ekinshiden, bıylmen salystyrǵanda granttar sanyn 2 500 orynǵa ulǵaıtý kózdeledi. Nátıjesinde qosymsha oryndardy eskere otyryp, 2025 jyly shamamen 78 myń bilim berý granty bólinetin bolady.
«Úshinshiden - joǵarǵy oqý oryndarynyń stýdentterine shákirtaqysy mólsherin orta eseppen 15-20 paıyzǵa ulǵaıtý. Nátıjesinde shákirtaqynyń ortasha mólsheri bakalavrıat stýdentteri úshin - 52 372 teńge, magıstratýra úshin 117 098 teńge bolady. Tórtinshiden - halyq sanynyń ósýi men naýqastar sanynyń ulǵaıýyn eskere otyryp, tegin medıtsınalyq kómektiń kepildendirilgen kólemi men mindetti áleýmettik medıtsınalyq saqtandyrý aıasynda halyqty medıtsınalyq kómekpen qamtýdy ulǵaıtý», - dedi ol.
