2025 jyly tutynýshylardan túsken ótinishter sany 134 paıyzǵa artqan
ASTANA. KAZINFORM — Tutynýshylardyń quqyqtaryn qorǵaý komıteti 2025 jyly azamattardyń ótinishterin qaraý jáne buzylǵan tutynýshylyq quqyqtardy qalpyna keltirý boıynsha keshendi jumys júrgizdi.
Komıtettiń málimetinshe, atalǵan qyzmet QR zańnamasyna sáıkes júzege asyrylyp, tutynýshylardyń quqyqtaryn qorǵaý deńgeıin arttyrýǵa, kásipkerlik sýbektileri tarapynan quqyq buzýshylyqtardyń aldyn alýǵa jáne eń problemaly salalarda baqylaýdy kúsheıtýge baǵyttalǵan.
- 2025 jyldyń 12 aıynda komıtetke jáne onyń aýmaqtyq departamentterine barlyǵy 83 801 ótinish kelip tústi. Bul 2024 jyldyń sáıkes kezeńimen salystyrǵanda 134 paıyzǵa artyq (2024 jyly – 62 561 ótinish). Qabyldanǵan sharalardyń nátıjesinde tutynýshylarǵa 2,804 mlrd teńge qaıtaryldy, bul ótken jylmen salystyrǵanda 135,6 paıyzdyq ósimdi kórsetedi (2024 jyly – 2,067 mlrd teńge).
Túsken ótinishterdiń 37,6 paıyzy qanaǵattandyryldy, 32,7 paıyzy túsindirme berý arqyly sheshildi, 22,9 paıyzy quzyretti memlekettik organdarǵa joldandy. Sonymen qatar ótinishterdiń 4,2 paıyzy ótinish berýshiler tarapynan keri qaıtarylsa, 2,6 paıyzy qaralý satysynda qaldy. 156 ótinish boıynsha talap-aryzdyq jumys júrgizildi, - delingen habarlamada.
Júrgizilgen taldaý nátıjesinde tutynýshylardyń quqyqtary kóbine bólshek saýda, elektrondyq saýda, turmystyq qyzmetter jáne turǵyn úı-kommýnaldyq sharýashylyq salalarynda buzylatyny anyqtaldy.
Atap aıtqanda, bólshek saýda salasyna 35 159 ótinish túsken, bul barlyq shaǵymdardyń 42 paıyzyn quraıdy. Elektrondyq saýda boıynsha 18 237 ótinish tirkelgen. Turmystyq qyzmetterge qatysty 6 220, al turǵyn úı-kommýnaldyq sharýashylyq salasy boıynsha 4 835 ótinish kelip tústi.
Sondaı-aq qoǵamdyq tamaqtandyrý, bilim berý, týrıstik, baılanys, kólik, qarjylyq jáne medıtsınalyq qyzmetterge qatysty shaǵymdar sany da aıtarlyqtaı artqany baıqalady. Áýe tasymaly salasy boıynsha kerisinshe, ótinishter sany ótken jylmen salystyrǵanda 55 paıyzdan astamǵa tómendegen.
Komıtettiń aýmaqtyq departamentteri tutynýshylardyń quqyqtaryn buzǵan kásipkerlik sýbektilerin ákimshilik jaýapkershilikke tartý boıynsha júıeli jumys júrgizip keledi. 2025 jyly 1 459 tekserý júrgizilip, onyń qorytyndysy boıynsha 1 125 kásipkerlik sýbektisi jalpy somasy 37,4 mln teńgeden astam aıyppulǵa tartyldy. Sonymen qatar 335 kásipkerlik sýbektisine eskertý túrindegi ákimshilik shara qoldanyldy.
Aıta keteıik, Qyzylordada tutynýshylardan túsetin aryz-shaǵym 2,1 ese kóbeıdi.