2025 jyly Tesla elektromobılder satylymynda qytaılyq BYD-den artta qaldy

ASTANA. KAZINFORM — Amerıkadaǵy Tesla elektromobılder óndirýshisi 2025 jyly onyń álemdik jetkizilimderi jyldyq esep boıynsha 8,6 paıyzǵa tómendegenin habarlady. Bul Tesla-nyń qytaılyq BYD avtokompanııasyna álemdik satylymdar boıynsha birinshi ret oryn berýi, dep habarlaıdy Sınhýa.

Kompanııa málimetteri boıynsha, 2025 jyly Tesla 1,655 mıllıon elektromobıl shyǵarǵan jáne 1,636 mıllıon jetkizgen. Bul 2024 jylmen salystyrǵanda tómen kórsetkish, onda 1,773 mıllıon shyǵarylyp, 1,789 mıllıon jetkizilgen bolatyn.

Satylymdarǵa ásirese 2025 jyldyń qyrkúıeginde AQSh-ta elektromobılderdi satyp alýdy yntalandyrǵan salyq jeńildikteriniń joıylýy aıtarlyqtaı áser etti.

2025 jyldyń tórtinshi toqsanynda Tesla 434 358 avtomobıl shyǵardy jáne 418 227 jetkizdi, bul ótken jyldyń dál osy kezeńimen salystyrǵanda tómen kórsetkish — 2024 jyly 459 445 shyǵarylǵan jáne 495 570 satylǵan edi. Tórtinshi toqsandaǵy jetkizilimder jyldyq esep boıynsha shamamen 16 paıyzǵa tómendedi.

Al beısenbide BYD kompanııasy 2025 jyly 2,257 mıllıon elektromobıl satylǵanyn habarlady, bul ótken jylmen salystyrǵanda 27,86 paıyzǵa kóp. Sonymen qatar, kompanııanyń satylymy Qytaıdan tys naryqtarǵa da keńeıip, Azııa, Eýropa jáne Latyn Amerıkasyndaǵy naryqtardan túsken tabys ósken.

Qazirgi ýaqytta Tesla AQSh-taǵy elektromobılder naryǵynyń 45 paıyzyn alyp otyrǵan eń iri óndirýshi bolyp qala beredi. Alaıda kompanııanyń satylymy tómendeýi amerıkandyq elektromobıl naryǵyndaǵy jalpy baıaýlaý úrdisin kórsetedi.

Cox Automotive zertteý kompanııasynyń málimeti boıynsha, 2025 jyldyń qarashasynda AQSh-ta barlyq marka boıynsha elektromobılderdiń satylymy jyldyq esep boıynsha 40 paıyzdan astamǵa tómendegen.

Sala sarapshylary 2026 jyly AQSh-ta elektromobılder satylymynyń áli de tómen deńgeıde qalatynyn boljap otyr.

Osydan buryn qytaı men nemis elektrli kólikteri Tesla-ny Eýropa naryǵynan yǵystyryp jatqanyn jazǵan edik.