2025 jyly Tájikstanda ortasha jalaqy 366 dollar shamasynda boldy
ASTANA. KAZINFORM — 2025 jyldyń qorytyndysy boıynsha Tájikstanda ortasha aılyq jalaqy 3483,04 somonıdi (shamamen 366 AQSh dollary) qurady, dep habarlaıdy Kazinform agenttiginiń Dýshanbedegi menshikti tilshisi.
Tájikstan Respýblıkasynyń statıstıka agenttiginiń málimetinshe, 2025 jylǵy jeltoqsanda eseptelgen ortasha nomınaldy jalaqy 3483,04 somonıdy qurap, 2024 jyldyń jeltoqsanymen salystyrǵanda 17,7%-ǵa artqan. Al eń tómengi jalaqy deńgeıi 1000 somonı bolyp saqtalǵan.
Salalar boıynsha eń joǵary jalaqy qarjy jáne saqtandyrý qyzmetkerlerinde – 9425,83 somonı. Odan keıin aqparat jáne baılanys salasy – 7306,33 somonı, energetıka – 6021,88 somonı, taý-ken óndirisi – 5913,14 somonı jáne qurylys salasy – 4597,83 somonı kórsetkishke ıe.
Eń tómengi jalaqy aýyl sharýashylyǵy, orman jáne balyq sharýashylyǵy salalarynda tirkelgen – 1708,81 somonı.
Óńirler boıynsha eń joǵary jalaqy Dýshanbede bolsa, eń tómengi kórsetkish Hatlon oblysy men Taýly-Badahshan avtonomııalyq oblysynda baıqalady.
Buǵan deıin Tájikstan halqy sońǵy 10 jylda 26%-ǵa ósip, 10,7 mıllıon adamǵa jetkeni habarlanǵan.
