2025 jyly tasqyndy boljaý jáne modeldeý aqparattyq júıesi engiziledi
ASTANA. KAZINFORM – Keler jyldan bastap elimizde tabıǵı apat, onyń ishinde topan sýdyń aldyn alýǵa arnalǵan tıisti málimetterdi jınaqtap aqparattyq júıe engizýdi josparlap otyr. Bul mindetti Úkimet basshysy Oljas Bektenov quzyrly organdarǵa tapsyrdy.
«Sý resýrstary jáne ırrıgatsııa mınıstrligi oblys ákimderimen birlesip, gıdrotehnıkalyq qurylystardy jóndeý men salýdy belgilengen merzimde aıaqtasyn. Tsıfrlyq damý, ınnovatsııalar jáne aeroǵarysh ónerkásibi mınıstrligi 2025 jylǵy aqpannyń sońyna deıin sala mamandaryn oqytyp, «Sý tasqynyn boljaý jáne modeldeý» aqparattyq júıesin engizýdi qamtamasyz etýge tıis. Tótenshe jaǵdaılar mınıstrligi jáne Ekologııa jáne tabıǵı resýrstary mınıstrlikteri 2025 jylǵy 20 qańtarǵa deıin osy júıeni qajetti derektermen tolyqtyrýdy qamtamasyz etsin», - dedi Oljas Bektenov mınıstrler men óńir ákimderine jańa mindet júkteı otyryp.
Sondaı-aq, Premer-Mınıstr tasqynnyń aldyn alý jáne qaıtalanbaý jumystary úshin Tótenshe jaǵdaılar mınıstrligi uıymdastyrýshy ári úılestirýshi organ ekenin eske saldy.
«Tótenshe jaǵdaılar mınıstrligi kelesi jyldaǵy sý tasqynynyń aldyn alý boıynsha ortalyq jáne jergilikti atqarýshy organdardy úılestirýdi qamtamasyz etýi qajet. Óńir ákimderi sý tasqynyna qarsy is-sharalar josparyn aldyn ala ári sapaly oryndaýdy qamtamasyz etýge tıis. Eń aldymen, bıyl kúz sońyna deıin eldi mekender aınalasynda topyraq úıý, qubyrlar men aryqtardy tazalaý, gıdrotehnıkalyq qurylystardy tekserý jáne sý jiberý kanaldaryn daıyndaý jumystaryn júrgizsin», - dep tolyqtyrdy O. Bektenov.
Buǵan deıin Úkimet basshysy halyq sý basqan óńirlerge qol ushyn sozyp, kóp bolyp kómekteskenin aıtty.
