Byltyr saýda salasy ekonomıkalyq ósimniń 26%-yn qamtamasyz etti
ASTANA. KAZINFORM — Saýda jáne ıntegratsııa mınıstri Arman Shaqqalıev vedomstvonyń alqa otyrysynda 2025 jyldyń qorytyndysyna toqtalyp, 2026 jylǵa arnalǵan basym baǵyttardy atap ótti. Bul týraly vedomstvonyń baspasóz qyzmeti málim etti.
Mınıstrdiń aıtýynsha, ótken jyl salanyń senimdi ósýi men saýdanyń el ekonomıkasyndaǵy rólin nyǵaıtý kezeńi boldy.
2025 jyly saýdanyń naqty kólem ındeksi 108,9% bolyp, jalpy ekonomıkalyq ósimge 26% úles qosty. Іshki taýar aınalymy 14,6% ósip, 80 trln teńgege jetti, al 2024 jyly bul kórsetkish 69,7 trln teńge bolǵan. Negizgi ósimdi kóterme saýda qamtamasyz etti, onyń kólemi 53,5 trln teńgeni qurady, al bólshek saýda segmenti 26,4 trln teńgege jetti.
— Sońǵy úsh jyldyń ishinde alǵash ret salalyq ınvestıtsııal turaqty ósimdi kórsetti, — dedi mınıstr.
Investıtsııalar kólemi birden 42% artyp, 1 229 mlrd teńgege jetti. Bul bıznestiń saýda sektoryna seniminiń artýyn jáne jańa ósý núkteleriniń qalyptasqanyn kórsetedi.
— Álemdik syn-qaterlerge qaramastan, syrtqy saýda da oń dınamıka kórsetti. Syrtqy taýar aınalymy 1,3% ósip, 143,9 mlrd dollarǵa jetti, al 2024 jyly bul kórsetkish 142,1 mlrd dollar bolǵan. Shıkizattyq emes eksport kólemi 1,2% ósip, 41 mlrd dollarǵa jetti. Qyzmet kórsetý eksporty aıtarlyqtaı ósimkórsetip, 3,7% arttyp, 12,3 mlrd dollarǵa jetti. 2024 jyly bul kórsetkish 11,8 mlrd dollar bolǵan, — delingen vedomstvonyń habarlamasynda.
Jyl qorytyndysy boıynsha syrtqy saýda balansynda oń saldo 14,2 mlrd dollar deńgeıinde saqtaldy. Arman Shaqqalıevtiń sózinshe, qol jetken nátıjeler saýdany ári qaraı ártaraptandyrýǵa, shıkizattyq emes eksportty keńeıtýge jáne 2026 jyly ıntegratsııalyq protsesterdi kúsheıtýge berik negiz qalyptastyrady.
Eske sala keteıik, Qazaqstan álem boıynsha kúnbaǵys maıyn eksporttaýshy úzdik úshtikke enýdi josparlap otyr.