2025 jyly promt-ınjınırıng degen jańa mamandyq paıda boldy - JI-kreator
ASTANA. KAZINFORM — Memleket basshysy Qasym-Jomart Toqaev 2026 jyldy Tsıfrlandyrý jáne jasandy ıntellekt jyly dep jarııalady. Osy oraıda jasandy ıntellektiniń búgingi múmkindikteri men bolashaǵy týraly JI-kreator Ómirbek Ábdiqul pikir bildirdi.
Mamannyń aıtýynsha, jasandy ıntellekt sońǵy jyldary aıtarlyqtaı qarqynmen damyǵanymen, onyń áleýeti áli tolyq ashylǵan joq.
— Jasandy ıntellekt 2–3 jyl buryn qarapaıym fýnktsııalarmen, mysaly, sýretti mýltfılmge aınaldyrý sııaqty múmkindiktermen tanyldy. Ol kezde qyzyǵýshylyq bolǵanymen, naqty suranys baıqalmady. Al 2025 jyly JI qatty damyp, áleýmettik jelilerde músinderdi bıletip, sýretterdi tiriltý keńinen tarady. Sońǵy on aıda tehnologııa realızm deńgeıine jetti. Biraq soǵan qaramastan, JI óz potentsıalynyń 100%-yn áli asha alǵan joq, — deıdi ol Jibek Joly telearnasynyń Búgin LIVE baǵdarlamasynda.
Onyń aıtýynsha, búginde Qazaqstanda jasandy ıntellekt kontent óndirisinde nebári 1% deńgeıinde ǵana qoldanylyp otyr. Al álemdik kórsetkish - shamamen 10% jetkenimen, bul da shekti deńgeı emes.
— Alǵash bolyp naryqty OpenAI kompanııasynyń ChatGPT ónimi jaýlap aldy. Qazir ol tek mátinmen shektelmeı, foto men vızýaldy kontent jasaýǵa múmkindik beretin ámbebap quralǵa aınaldy, — dep atap ótti maman.
Ómirbek Ábdiquldyń sózinshe, jasandy ıntellekt salasy óte aýqymdy, al foto men vıdeo baǵytynda ony kez kelgen adam úırene alady.
— Úıde otyryp-aq tolyq meńgerýge bolady. Noýtbýk nemese telefon bolsa jetkilikti. Qazir kompanııalardan da, jeke tulǵalardan da tapsyrys kóp. Bul salada eń basty másele — promt, ıaǵnı tapsyrmany durys qoıa bilý. Sol sebepti 2025 jyly promt-ınjınırıng degen jańa mamandyq paıda boldy. 2026 jyly mundaı jańa mamandyqtar kóbeıe beredi, — dedi ol.
Maman jasandy ıntellektiniń medıtsına men ınjenerııa salalarynda da tıimdi qoldanylyp jatqanyn aıtty. Máselen, dári-dármektiń túpnusqasyn foto arqyly anyqtaý nemese ınjenerlik jobalardyń álsiz tustaryn aldyn ala boljaý múmkindigi bar.
Sonymen qatar ol jasandy ıntellekt qaýipsizdik talaptaryn saqtaıtynyn atap ótti.
— JI zorlyq-zombylyq bar kontent jasamaıdy, ondaı promttardy qabyldamaıdy. Sondaı-aq adamnyń fotosyn paıdalanyp alaıaqtyq jasaýǵa qarsy verıfıkatsııa tetikteri engizilgen. Degenmen keıbir zańsyz platformalarǵa qarsy quqyqtyq sharalar qajet, — dedi JI-kreator.
Aıta keteıik, Prezıdent tapsyrmasymen «Jasandy ıntellekt týraly» zań qabyldanǵany jaıly jazǵan edik.