2025 jyly Prezıdenttik jastar kadr rezervine kezekti irikteý ótedi
ASTANA. KAZINFORM — Óńirlik rezervke qabyldanǵan 505 adamnyń 76-sy jergilikti atqarýshy organdardaǵy laýazymdarǵa konkýrstan tys ornalasty.

Bul týraly Memlekettik qyzmet isteri agenttiginiń tóraǵasy Darhan Jazyqbaı memlekettik organnyń 2024 jylǵy jumys qorytyndysy boıynsha alqa otyrysynda málimdedi.
Onyń sózine qaraǵanda, bıyl Prezıdenttik jastar kadr rezervine kezekti irikteý uıymdastyrylady.
Agenttik tóraǵasy Memleket basshysynyń tikeleı bastamasymen 2019 jyly iske qosylǵan Prezıdenttik jastar kadr rezervin qurý daryndy jastardy memlekettik basqarý isine tartýǵa mol múmkindikter týdyrǵanyn atap ótip, rezervti odan ári jetildirý josparlaryn aıtty. Bul turǵyda bolashaq rezervshilerdi jumysqa ornalastyrý múmkindikterine qatysty erejelerdi naqtylaý usynylady. Rezerv músheleri tıisti saıası jáne ákimshilik memlekettik laýazymdarǵa úmitker bolady. Rezervtiń negizgi mindeti — memlekettik qyzmette jumys isteýge daıyn bilikti jas mamandardy irikteý.
Sondaı-aq 2024 jyly Prezıdenttiń tapsyrmasyn oryndaý aıasynda, ıaǵnı jergilikti organdardyń kadrlyq qajettilikterin qanaǵattandyrý maqsatynda elimizdiń barlyq óńirinde alǵash ret oblystardyń, respýblıkalyq mańyzy bar qalalardyń, astananyń Óńirlik kadr rezervterine júrgizilgen irikteý nátıjeleri aıtyldy.
Onyń aıtýynsha, byltyr qyrkúıek aıynda aıaqtalǵan irikteý nátıjeleri boıynsha Óńirlik rezervke qabyldanǵan 505 adamnyń 76-sy jergilikti atqarýshy organdardaǵy «B» korpýsynyń laýazymdaryna konkýrstan tys ornalasty.
Atap ótý kerek, Óńirlik kadr rezerviniń maqsaty — aımaqtardaǵy bilikti ári bilimdi jastardy memlekettik qyzmet júıesine tarta otyryp, olardyń áleýetin tıimdi paıdalaný.
Eske salsaq, 2024 jyldyń 1 naýryzynan bastap oblystardyń, respýblıkalyq mańyzy bar qalalardyń jáne astananyń óńirlik kadr rezervterine irikteý bastalǵanyn jazǵan edik.
Jaqynda Úkimettiń keńeıtilgen otyrysynda Prezıdent Qasym-Jomart Toqaev otanshyl kadrlar basshylyq laýazymdarǵa taǵaıyndalatynyn aıtty.