2025 jyly Prezıdent muraǵaty Almatydan Astanaǵa kóshiriledi

ASTANA. KAZINFORM – Prezıdent muraǵatyn Almaty qalasynan elordaǵa kóshirý týraly Memleket basshysynyń Jarlyǵy jarııalandy. 

«Qazaqstan Respýblıkasynyń Úkimeti 2025 jylǵy 1 naýryzǵa deıin «Qazaqstan Respýblıkasy Prezıdentiniń muraǵaty» respýblıkalyq memlekettik mekemesin Almaty qalasynan Astana qalasyna kóshirýdi qamtamasyz etsin», - delingen Jarlyq mátininde.

Osy oraıda «Qazaqstan Respýblıkasy Prezıdenti muraǵatynyń keıbir máseleleri týraly» Qazaqstan Respýblıkasy Prezıdentiniń 2022 jylǵy 9 aqpandaǵy №808 Jarlyǵyna birqatar ózgeris engizilmek. Sondaı-aq, Jarlyqta muraǵattyń shtat sany 108-den 168 qyzmetkerge deıin artatyny aıtylǵan.

Eske sala ketsek, Prezıdent muraǵatynda el tarıhyna qatysty 1 mln astam qujat saqtalǵan.