2025 jyly Otbasy bank ıslamdyq ıpotekany engizbek
ASTANA. KAZINFORM – Otbasy bank keler jyly ıslam ıpotekany engizýdi josparlap otyr. Bul týraly atalǵan banktiń basshysy Lázzat Ibragımova aıtty.
«Dinı ustanym turǵysynda paıyzdyq ósimdi haram sanaıtyn adamdar bar. Bizdiń banktiń salymshylary bul baǵytta tıisti ıpotekany engizý týraly usynys aıtyp jatyr. Zańnama aıasynda tıisti usynystardy pysyqtap, 2025 jyly osy tetikti engizýdi josparlap otyrmyz. Ideıa retinde osyny qarastyryp jatyrmyz. Bul turǵyda naqty erejeler bolmaǵandyqtan, qazir naqty bir jańalyqty qosyp aıta almaımyn», - dedi L.Ibragımova Senattyń jalpy otyrysynan keıin tilshiler suraǵyna jaýap bere otyryp.
Aıta keteıik, búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine turǵyn úı saıasatyn reformalaý máseleleri boıynsha ózgerister men tolyqtyrýlar engizý týraly» Zańy eki oqylymda qaraldy. Senat zańnyń jekelegen baptaryn jańa redaktsııada usynyp, ony Májiliske qaıtardy.
Senattyń Ekonomıkalyq saıasat, ınnovatsııalyq damý jáne kásipkerlik komıtetiniń málimetinshe, Zań boıynsha «Otbasy banki» AQ-ny ulttyq damý ınstıtýty etip qaıta qurý eskerilgen. Bul rette «Otbasy banki» AQ-ǵa jergilikti atqarýshy organdardyń muqtajdar úshin turǵynjaıdy esepke alýdy ári qoıýdy jáne bólýdi júzege asyrý jónindegi fýnktsııalary beriledi.
Sondaı-aq «Otbasy banki» AQ-ǵa turǵyn úıge muqtajdar týraly málimetterdi qamtıtyn, basqa da memlekettik derekqorlarmen ıntegratsııalanǵan «Turǵyn úımen qamtamasyz etý ortalyǵy» elektrondyq bazasyn qalyptastyrý, júrgizý, monıtorıngteý jónindegi fýnktsııalar bekitiledi.
