2025 jyly otandyq áýe kompanııalarynyń parki 25 ushaqpen tolyǵady
ASTANA. KAZINFORM – QR Kólik mınıstrliginiń keńeıtilgen alqa otyrysynda vedomstvo basshysy Marat Qarabaev otandyq avıatsııany damytýdyń 2025 jylǵa josparlanǵan negizgi mindetterin atap ótti.
Sondaı-aq bıyl Shymkent, Qyzylorda jáne Almaty áýejaılarynyń jańa jolaýshylar termınaldarynyń qurylysyn aıaqtaý josparlanǵan.
- Mınıstrdiń aıtýynsha, vedomstvo áýejaılardyń ınfraqurylymyn jańǵyrtý tóńiregindegi jumystardy jalǵastyryp jatyr. Bıyl Shymkent, Qyzylorda jáne Almaty áýejaılarynyń jańa jolaýshylar termınaldarynyń qurylysyn aıaqtaý josparlanǵan. Nátıjesinde Almaty áýejaıynyń ótkizý qabileti 5 esege (14 mln jolaýshyǵa deıin), Qyzylordada – 6 esege (2 mln-ǵa deıin) jáne Shymkent áýejaıynda 7 esege (6 mln-ǵa deıin) ulǵaıady.
Birikken Arab Ámirlikteriniń ınvestory jańa basqarýshy kompanııanyń aldyna qoıylǵan birinshi kezektegi mindetterdiń biri retinde óz qarajaty esebinen astanalyq áýejaıdyń ushý-qoný jolaǵyn jóndeýge kirisedi.
Sondaı-aq Memleket basshysynyń tapsyrmasy boıynsha Pavlodar qalasy áýejaıynyń ushý-qoný jolaǵy jáne Balqash qalasy áýejaıynyń perrony men taksı jolaǵyn qaıta jańartý jumystary bastalady.
Elimizdiń áýejaılarynda mýltımodaldy ortalyqtar qurý úshin jeke ınvestorlardy tartý boıynsha keshendi jumystar júrgizilip jatyr.
2025 jyldyń sońyna deıin áýe kemeleriniń parkin 25 birlikke ulǵaıtý josparda bar.
Avıaotyn tapshylyǵy máselesin sheshý úshin ımporttalatyn áýe otynnyń, onyń ishinde Jet A-1 markasynyń kólemi ulǵaıtylatyn bolady. Osy maqsatta Almaty áýejaıynyń janarmaı quıý kesheni jańǵyrtýdan keıin, ıaǵnı 2024 jylǵy maýsymnan bastap avıaotynnyń osy túrin paıdalanýǵa kóshedi.
Qalǵan áýejaılar ózderiniń múmkindikteri men qajettilikterin eskere otyryp, osy janarmaı markasyn kezeń-kezeńmen paıdalanýǵa kóshedi.
Avıaotynnyń túpkilikti qunyna áser etetin deldaldyq qurylymdardy boldyrmaý úshin mınıstrlik munaı óńdeıtin zaýyttardan tikeleı satyp alý máselesin pysyqtap jatyr.
«Jalpy, Memleket basshysynyń tapsyrmalary men sala aldynda turǵan mindetter ýaqytyly oryndalatyn bolady. Onyń ishinde, avıaotynmen qamtamasyz etý, mýltımodaldy habtar qurý, áýe tasymaldarynyń qoljetimdiligin arttyrý jáne áýe kemeleri parkin tolyqtyrý jónindegi sharalar. Nátıjesinde aldaǵy 6 jylda áýe kóligin paıdalanatyn jolaýshylar sanyn 2 esege jáne óńdelgen júk kólemin 7 esege arttyrýǵa nıettimiz», – dedi mınıstr.
