2025 jyly ósimdikter karantıni salasynda 3,6 myń zańbuzýshylyq anyqtaldy
ASTANA.KAZINFORM - Elimizdiń aýmaǵynda ósimdikter karantıni nysandaryn anyqtaý boıynsha jumys ulttyq zańnamaǵa jáne Eýrazııalyq ekonomıkalyq odaq talaptaryna qatań sáıkes júrgizilip jatyr, dep habarlaıdy QR Aýyl sharýashylyǵy mınıstrliginiń baspasóz qyzmeti.
Qoldanystaǵy fıtosanıtarlyq baqylaý júıesi kóp deńgeıli qaǵıdat boıynsha qurylǵan. Bastapqy tekserýdi shekarada memlekettik ınspektorlar júzege asyrady, al qaıtalama tekserý taýardyń jetkizilý orny boıynsha júrgiziledi. Mundaı tásil táýekelderdi barynsha azaıtýǵa jáne qaýipti karantındik organızmderdiń ákelinýine baılanysty yqtımal qaýipterge jedel áreket etýge múmkindik beredi.
Byltyr QR AShM AÓK memlekettik ınspektsııa komıteti aýmaqtyq ınspektsııalary tarapynan baqylaý-qadaǵalaý qyzmetterin oryndaý barysynda ósimdikter karantıni salasynda 3,6 myń zańbuzýshylyq anyqtaldy, onyń ishinde 2,6 myńy basqa memleketterden ákelinetin karantındik ónimderge qatysty.
Karantındik obektilerdi anyqtaý kórsetkishteriniń ósýi, sonyń ishinde ımporttyq ónimderde, fıtosanıtarlyq baqylaý tıimdiliginiń artqandyǵynyń jáne qadaǵalaý sharalarynyń kúsheıtilgendiginiń kórsetkishi.
Baqylaý júıesin jańǵyrtý aıasynda ýákiletti organ tsıfrlyq transformatsııany qarqyndy qolǵa aldy. Ónim aınalymynyń barlyq kezeńderinde qadaǵalaýdy qamtamasyz etetin zamanaýı aqparattyq júıeler engizilip jatyr.
Reseı Federatsııasy jáne Qyrǵyz Respýblıkasy shekarasyndaǵy barlyq 32 baqylaý beketi turaqty ınternetke qosylǵan, bul derektermen jedel almasýǵa múmkindik berip, rásimderdiń ashyqtyǵyn arttyrady.
Sonymen qatar zerthanalyq ınfraqurylymdy jańartý jumystary júrgizilip jatyr. Fılıaldar PTR-júıelerin qosa alǵanda zamanaýı dıagnostıkalyq jabdyqtarmen qamtylýda, bul saraptamalardyń dáldigi men jyldamdyǵyn aıtarlyqtaı ulǵaıtady.
Osylaısha, qazirgi kórsetkishter Qazaqstandaǵy ósimdikter karantıni júıesiniń tıimdi jumys isteıtinin, el aýmaǵyn fıtosanıtarlyq qaýipterden senimdi qorǵaýdy qamtamasyz etip, agrarlyq sektordyń turaqty damýyna jaǵdaı jasalyp otyrǵanyn aıǵaqtaıdy.
Osyǵan deıin bes oblysta fıtosanıtarııalyq saraptamanyń jańa aqyly tártibi pılottyq rejımde iske qosylǵany týraly jazdyq.
