2025 jyly Ortalyq Azııa ekonomıkasynyń ósimi 5%-dy quraıdy – boljam
ASTANA. KAZINFORM – 2025 jyly Azııa elderiniń jalpy ishki ónimi (JІÓ) 4,5%-ǵa ósedi. Bul boljam «Azııa-2025: Ekonomıkalyq perspektıvalar jáne ıntegratsııa úderisi» atty esepte keltirilgen.
Qujat Boaos azııalyq forýmynyń (BAF) jyl saıynǵy konferentsııasyna arnalǵan. Forým osy kúnderi Qytaıdyń ońtústigindegi Haınan provıntsııasynda ótýde.
Boaos azııalyq forýmynyń baıandamasynda bylaı delingen: «Jahandyq ekonomıkalyq ósimge qatysty belgisizdik artqanyna qaramastan, Azııa álemdik ekonomıkanyń negizgi qozǵaýshy kúshteriniń biri bolyp qala beredi. 2025 jyly Azııanyń naqty JІÓ ósimi 4,5%-ǵa jetedi, bul ótken jylǵy 4,4%-dan sál joǵary».
Aımaqtar boıynsha ósim boljamy:
- Shyǵys Azııa — 4,3%
- Ońtústik Azııa — 5,9%
- Batys Azııa — 2,9%
- Ortalyq Azııa — 5,0%
Sarapshylardyń boljamy boıynsha, 2025 jyly Azııanyń álemdik JІÓ-degi úlesi satyp alý qabilettiligi parıteti boıynsha 48,6%-ǵa deıin artady.
Azııadaǵy syrtqy saýda birtindep qalpyna kelýde, al qyzmet kórsetý salasyndaǵy saýda qarqyndy ósip keledi.
Innovatsııalar boıynsha Azııa álemdik kóshbasshyǵa aınaldy:
- Ǵylymı zertteýler men tájirıbelik-konstrýktorlyq jumystarǵa (NIOKR) ınvestıtsııalar kólemi boıynsha Azııa basqa óńirlerden basym túsýde.
- Patenttik ótinimder sany boıynsha da Azııa aldyńǵy qatarda.
Boaos azııalyq forýmy (BAF) «Ózgermeli álemdegi Azııa: ortaq bolashaqqa umtylý» uranymen osy aptada Qytaıdyń Haınan provıntsııasynda bastaldy.
Forým týraly:
- 2001 jyly qurylǵan.
- 29 eldiń qatysýymen jumys isteıtin úkimettik emes halyqaralyq uıym.
- Maqsaty — Azııadaǵy ekonomıkalyq ıntegratsııany damytý.
- BAF «Shyǵystyń Davosy» dep atalady, sebebi ol saıasatkerler, bıznes ókilderi men ǵalymdar úshin joǵary deńgeıli dıalog alańy bolyp sanalady.
- Bıyl forým aıasynda 50-den astam paneldik talqylaýlar men qosalqy forýmdar ótedi.
- BAF-tyń ashylý rásimi 27 naýryzda ótedi.
Aıta keteıik, buǵan deıin QR Úkimetiniń basshysy Oljas Bektenov Ortalyq Azııadaǵy tranzıttik hab retinde jańa joba kerek ekenin aıtqan.