2025 jyly onlaın-oıyndarǵa aqshalaı qarajat salý arqyly jasalǵan 128 alaıaqtyq tirkeldi
ASTANA. KAZINFORM — Ótken jyly 113 myńnan astam tyıym salynǵan materıaldar jarııalaǵan ınternet-resýrstar anyqtaldy. Bul týraly Májilis depýtattarynyń saýalyna Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıevtiń jaýabynda aıtylǵan.
— Tsıfrlyq ortany monıtorıngileý maqsatynda «Kıberbaqylaý» aqparattyq júıesi jumys isteıdi. Ol zańsyz kontentti anyqtaý men shekteý kezinde vedomstvoaralyq úılestirýdi qamtamasyz etedi jáne tıisti sharalar qabyldaı otyryp, ınternet-keńistigindegi zań buzýdy jedel anyqtaıdy. 2025 jyldyń qorytyndysy boıynsha quqyq qorǵaý organdary «Kıberbaqylaý» aqparattyq júıesine 113 328 ınternet-silteme engizip, olar boıynsha jedel áreket etý sharalaryn iske asyrdy, — dedi vıtse-premer.
Onyń dereginshe, Іshki ister mınıstrligi ótken jyly 113 myńnan astam tyıym salynǵan materıaldardy jarııalaǵan ınternet-resýrstardy anyqtap, 34 myńnan astamyna shekteý qoıdy.
— Quqyq qorǵaý organdary Bas prokýratýramen birlesip, tsıfrlyq jáne onlaın ortadaǵy quqyq buzýshylyq faktilerin, onyń ishinde ınternet-alaıaqtyq, kıberbýllıng, onlaın-tıisý jáne kámeletke tolmaǵandardy zańsyz qyzmetke tartý boıynsha jedel áreket jasap jatyr. Prokýratýra organdarynyń aqparatyna sáıkes, 2025 jyly onlaın-oıyndarǵa aqshalaı qarajat salý arqyly jasalǵan 128 alaıaqtyq jaǵdaıy tirkeldi, — dedi ol.
Vıtse-premer árbir anyqtalǵan fakt boıynsha quqyq qorǵaý organdary Internet resýrstardyń ákimshiligimen ózara is-qımyl jasaıtynyn, materıaldardy ýákiletti memlekettik organdarǵa joldaıtynyn atap ótedi.
— Tyıym salynǵan aqparat anyqtalǵan jaǵdaıda Qazaqstan Respýblıkasynyń zańnamasyna sáıkes, mundaı aqparatqa qoljetimdilik shekteledi, — dedi Jaslan Mádıev.
Aıta keteıik, Májilis depýtaty Únzıla Shapaq Roblox onlaın-platformasyn shekteýge qatysty usynys bildirgen edi.