2025 jyly memleket 93 myń bilim grantyn bóldi

ASTANA. KAZINFORM — 2029 jylǵa deıin joǵary bilim salasyn damytýdyń negizgi basymdyqtary aıqyndaldy. Ǵylym jáne joǵary bilim vıtse-mınıstri Gúlzat Kóbenova Joǵary bilim salasynyń ózekti máseleleri jóninde brıfıng ótkizdi.

Vıtse-mınıstrdiń aıtýynsha, 2029 jylǵa deıin joǵary bilim salasyn damytýdyń negizgi basymdyqtary aıqyndaldy. Onda joǵary oqý oryndaryn transformatsııalaýdyń aıqyn baǵyty belgilengen, ıaǵnı qarapaıym bilim berýden ekonomıka, básekege qabiletti mamandar daıarlaýǵa kóshý kózdelgen. 

— 2025 jyly memleket tarapynan 93 myń bilim berý granty bólinip, onyń 99%-dan astamy tolyq ıgerildi. Áleýmettik jáne nysanaly tetikter aıtarlyqtaı keńeıtildi: olardyń qatarynda qandastarǵa, erekshe bilim berý qajettilikteri bar adamdarǵa jáne merzimdi áskerı qyzmetin ótkerip júrgen jastarǵa arnalǵan granttar bar, — dedi G. Kóbenova Ortalyq kommýnıkatsııalar qyzmetinde ótken brıfıngte.

Búgingi tańda 127 joǵary jáne joǵary oqý ornynan keıingi bilim berý uıymy joǵary bilimi bar kadrlardy daıarlaıdy. Olardyń qatarynda QR joǵary oqý oryndary, sheteldik joǵary oqý oryndarynyń fılıaldary, ǵylymı ortalyqtar men ınstıtýttar bar.

— Sońǵy bir jylda baǵdarlamalardyń 85%-y kásibı standarttardy eskere otyryp ózektendirildi. 2025 jyly kásibı standarttar eskerilip, 727 jańa bilim baǵdarlamasy engizildi, 5 607 baǵdarlama jańartyldy. Osylaısha, joǵary oqý oryndary «bilimge negizdelgen» modelden quzyrettilik modeline, formaldy sáıkestikten – «bilim men eńbek naryǵynyń» mazmundy baılanysyna kóship jatyr.

Aıta keteıik, elimizde bilim berý, zertteý jáne qoldanbaly tásilderdi biriktiretin AI-Sana baǵdarlamasy bıyl da jalǵasady. AI-Sana aıasynda 100 myń stýdent JI algorıtmderin meńgeredi.