2025 jyly qutqarýshylar janýarlarǵa qalaı kómek kórsetti
ASTANA. KAZINFORM – 2025 jyly Tótenshe jaǵdaılar mınıstrliginiń qyzmetkerleri janýarlarǵa 400-den astam jaǵdaıda kómek kórsetti. Bul kórsetkish tek resmı tirkelgen shaqyrtýlardy qamtıdy. Naqty jaǵdaılar sany budan da kóp.
Úı jáne jabaıy janýarlar túrli sebeptermen ózdiginen shyǵa almaıtyn jaǵdaılarǵa jıi tap bolady. Osyndaı sátterde qutqarýshylardyń kómegine júginýge týra keledi.
Kóbinese TJM qyzmetkerleri mysyqtarǵa, ıtterge jáne jylqylarǵa kómek kórsetti. Shamamen júzge jýyq jaǵdaıda mysyqtar qutqarylsa, 80-ge tarta jylqyla járdem kórsetilgen. Itter de osy shamalas jaǵdaıda qutqarylǵan.
Sonymen qatar qutqarýshylar jyl boıy aqbókenderge, túlkilerge, túıelerge, sıyrlar men qoılarǵa, qustarǵa, jarqanattarǵa jáne jylandarǵa da kómek kórsetti. Mundaı oqıǵalar elimizdiń barlyq óńirlerinde, qalalyq aýmaqtarda da, dala men jetýi qıyn aımaqtarda da tirkeldi.
- Árbir shaqyrtý jedel áreket etýdi jáne naqty sheshim qabyldaýdy talap etedi. Mysaly, Aqtóbe qalasynda qutqarýshylar ózenge muz astyna túsip ketken jylqyny qutqarý úshin shamamen úsh saǵat boıy jumys júrgizdi. Kólikpen jetý múmkin bolmaǵandyqtan, oqıǵa ornyna jaıaý barǵan. Muzdy jaryp, jaǵalaýǵa deıin jol salynǵannan keıin janýar qaýipsiz jerge shyǵarylyp, jyly sharýashylyq ǵımaratyna jetkizildi.
Astanada bıtýmǵa batyp qalǵan ıtke kómek kórsetildi. Qutqarýshylar qolda bar quraldardy paıdalanyp, janýardy abaılap bosatyp, ıesine tapsyrdy.
Qostanaı oblysynda túngi ýaqytta qutqarýshy alpınıstik jabdyqtyń kómegimen qudyqqa qulap ketken kúshikti shyǵarý úshin shamamen toǵyz metr tereńdikke tústi. Qaraǵandyda jeke turǵyn úıdiń shatyrynan ózdiginen qozǵala almaı qalǵan jańa týǵan marǵaý qutqaryldy, - delingen aqparatta.
Órtke baılanysty jaǵdaılar da erekshe nazar aýdartady. Qaraǵandy qalasynda kópqabatty turǵyn úıdiń jertólesinde shyqqan órt kezinde qutqarýshylar turǵyndardy evakýatsııalaýmen qatar, tútinge toly jerde es-tússiz jatqan ıtti anyqtady. Janýarǵa tynys alý apparaty arqyly alǵashqy kómek kórsetilip, keıin ıesine tabystaldy.
Janýarlardy qutqarý Tótenshe jaǵdaılar mınıstrligi avarııalyq-qutqarý qyzmetiniń ajyramas bóligi sanalady. Tirkelgen 400-den astam jaǵdaı – kúndelikti ári kóp jaǵdaıda kózge kórine bermeıtin eńbektiń bir bóligi ǵana. Mundaı jumystarda «mańyzdy» nemese «ekinshi kezektegi» degen aıyrmashylyq joq. Ómirge qaýip tóngen jaǵdaıda kómek zardap shekken tirshilik ıesiniń túrine qaramastan kórsetiledi.
Aıta keteıik, Almaty taýlarynda qutqarý pýnktteri qaıda ornalasqanyn myngaý siltemeden bilińiz.