2025 jyly Kólsaı men Sharynǵa 850 myń týrıst barǵan

QONAEV. KAZINFORM — Almaty oblysynyń kórikti jerlerine baratyn týrıster sany artqan.

Oblystyq týrızm basqarmasynyń basshysy Qýanyshbek Mırambekulynyń aıtýynsha, ótken jyly óńirde 520 995 ishki týrıst saıahattaǵan. Ol «eQonaq» aqparattyq júıesiniń málimetine sáıkes, byltyr oblysqa 147 003 shetel azamaty kelgenin atap ótti.

— Kórsetilgen qyzmet kólemi 12,3 mlrd teńgege jetip, 50 paıyzǵa ulǵaıdy. Týrızmniń óńirlik jalpy ónimdegi úlesi 5,4 paıyzǵa jetip, 198,5 mlrd teńgeni kórsetti. Al oıyn-saýyq ındýstrııasynan 81,7 mlrd teńge kiris tústi, — dedi ol.

Vedomstvo basshysy 2025 jyly «Іle-Alataýy» ulttyq tabıǵı parkine 945 993 adam barǵanyn aıtty. Al «Kólsaı kólderi» ulttyq parkine 600 026 adam kelip, kelýshiler sany 51,8 paıyzǵa artqan. «Sharyn» shatqalynda demalýshylar eki ese kóbeıip, 249 928 adamǵa jetti.

Eske salaıyq, buǵan deıin Almaty taýlaryndaǵy týrısterge arnalǵan úıshikterdiń jaı-kúıi qalaı ekenin jazǵanbyz.