2025 jyly kóktemde aýa raıy qandaı bolady
ASTANA. KAZINFORM – Qazgıdromet 2025 jylǵy naýryzdan mamyrǵa deıingi aralyqtaǵy aýa raıy boljamyn jarııalady.
Sınoptıkterdiń boljamy boıynsha, naýryz - mamyr aılarynda Qazaqstan aýmaǵynda temperatýralyq fon ádettegiden jylyraq, ıaǵnı normadan 1-2 gradýsqa joǵary bolady. Alaıda bul rette aýa temperatýrasy tómen kezeńder de bolýy múmkin.
Ortalyq Azııa aımaqtarynda jylý qarqyn alǵanda jaz mezgilindeı kún ysyp, ásirese sáýir jáne mamyr aılarynda osy qubylys baıqalýy múmkin. Mysaly, byltyr sáýir aıynyń ortasynda respýblıkanyń kóp oblysynda termometr baǵany +22+30°S-qa jetken. Kóktemde jazdyń aýa raıy ornaǵan.
2025 jyldyń kókteminde óńirler boıynsha jaýyn-shashyn mólsheri ártúrli bolady.
Naýryz aıynda respýblıkanyń basym bóliginde normadan kóp, eldiń ońtústik-batys jartysynda (Mańǵystaý, Qyzylorda, Túrkistan, Jambyl oblysynyń soltústik-batysynda, Aqtóbe jáneUlytaý oblystarynyń ońtústiginde) normaǵa jýyq jaýyn-shashyn boljanady.
Sáýir aıynda respýblıkanyń basym bóliginde boljam qalypty, respýblıkanyń soltústik-batys jartysynda (Aqtóbe, Qostanaı, Soltústik Qazaqstan oblystarynyń basym bóliginde, Batys Qazaqstan oblysynyń soltústik-shyǵysynda jáne Aqmola oblysynyń soltústik-batysynda) normadan artyq bolady dep boljanyp otyr.
Mamyr aıynda Qazaqstan aýmaǵynyń basym bóliginde normaǵa jýyq, eldiń ońtústik-batys bóliginde jáne ortalyǵynda (Mańǵystaý, Ulytaý, Qaraǵandy oblystarynda, Qyzylorda oblystarynyń basym bóliginde, Aqtóbe oblysynyń ońtústiginde, Túrkistan, Jambyl jáne Almaty oblystarynyń soltústiginde) normadan az bolýy múmkin.
Mamyr aıynda norma qıyr soltústik-batysta, eldiń ońtústiginiń, ońtústik-shyǵysynyń, shyǵysynyń taýly, taý bókterli aýdandarynda (Batys Qazaqstan, Aqtóbe, Qostanaı, Soltústik Qazaqstan oblystarynyń soltústik-batysynda, sondaı-aq eldiń ońtústigi men ońtústik-shyǵysynyń, shyǵysynyń taýly jáne taý bókterli aýdandarynda) jańbyr kóbirek jaýady.
Sınoptıkter kóktemde aýa temperatýrasy kúrt qubylýy múmkin ekenin eskertedi. Keı jerlerde qar jaýady, ásirese soltústik oblystarda, sondaı-aq arktıkalyq aǵyndar kezinde boran bolyp, kún kúrt sýytýy múmkin. Degenmen ońtústik aýa aǵyndarynyń kúsheıýimen, ásirese sáýir jáne mamyr aılarynda temperatýra birden joǵarylap, ysýy múmkin. Osylaısha, 2025 jyly sáýir aıynyń ortasynda Qazaqstannyń basym bóliginde termometr +22, +30°S-qa deıin kóteriledi.
2025 jyldyń kóktemi elimizde negizinen jyly bolady. Biraq ara-tura sýyq aýa raıy boljanady. Qar jaýyp, aıaz bolýy múmkin, sondaı-aq ystyq aýa raıy erte bastalýy múmkin.
Jaýyn-shashyn árkelki taralady: soltústik oblystarda ylǵal kóbirek, ońtústik jáne ortalyq aımaqtarda az bolady.
Elimizdiń 14 óńirinde aýa raıyna baılanysty eskertý jarııalanǵanyn jazǵan bolatynbyz.