2025 jyly Qytaıda qazaq kúresinen álem chempıonaty ótýi múmkin
ASTANA. KAZINFORM – Qazaq Kuresi qaýymdastyǵynyń bas dırektory Damır Bekbosynov Astanaǵa issaparmen kelgen Qytaı Halyq Respýblıkasy delegatsııasynyń ókilderimen kezdesti.
Kezdesý barysynda Qytaıdyń Hýnan provıntsııasyndaǵy Chansha qalasy úkimetiniń ókili Lı Dı búgingi tańda eki eldiń arasyndaǵy saýda, ınvestıtsııa salasyndaǵy yntymaqtastyqtyń perspektıvalyq baǵyttary jeterlik ekenin, al sońǵy jyldary sport salasyndaǵy baılanysty nyǵaıtý baǵytynda, onyń ishinde eki eldiń ulttyq kúresin damytý jolynda birlese jumys isteýge degen qyzyǵýshylyqtyń arta túskenin atap ótti.
Osy oraıda, sheteldik qonaq Qazaqstan men Qytaı arasyndaǵy kóp jylǵy dostyq qarym-qatynasty nyǵaıtý úshin 2025 jyly Qytaı elinde qazaq kúresinen eresekter arasyndaǵy álem chempıonatyn ótkizý týraly usynysyn jetkizdi.
Delegatsııa ókiliniń aıtýynsha, álem chempıonatyn Qytaıdyń memlekettik jáne saıası qaıratkeri Maý Zydoń týyp-ósken Hýnan qalasynda ótkizý mańyzdy qadam bolmaq. Bul Qytaıdaǵy eń tanymal týrıstik baǵyttardyń biri, 66 mln turǵyny bar álemge tanymal týrıstik shahar.
Shara barysynda Lı Dı 2022 jyly Astanada 40-tan astam eldiń 350 sportshysy qatysqan álem chempıonatynyń beınematerıaldarymen jáne qazaq kúresi týraly maǵlumattarmen tanysty.
Kezdesý aıasynda qos taraptyń ókilderi perspektıvalyq yntymaqastyq baǵyttaryn egjeı-tegjeıli talqylady.
Óz tarapynan Damır Ásenǵazyuly Álem chempıonaty sııaqty iri halyqaralyq dodanyń ekonomıkalyq áleýetin dúnıejúzi moıyndaǵan Qytaı sııaqty alpaýyt elde ótýi qazaq kúresiniń damýyna jańa serpin beretinin atap ótti.
Kezdesý sońynda Damır Bekbosynov delegatsııa ókilderine aspan asty elinde qazaq kúresiniń damýyna ózindik úlesin qosyp júrgeni úshin Song Djıanmın myrzaǵa QR Týrızm jáne sport mınıstri Erbol Myrzabosynovtyń Alǵys hatyn jáne qazaqy dástúrmen qaýymdastyqtyń atynan kádesyılardy tabystady.
Buǵan deıin habarlaǵanymyzdaı, Taraz qalasynda qazaq kúresinen eresekter arasynda Qazaqstan Respýblıkasynyń chempıonaty ótip jatyr.
