2025 jyly Qytaıda 20 mıllıonnan astam qoldanylǵan avtokólik satyldy

ASTANA. KAZINFORM — Byltyr Qytaıda qoldanylǵan avtokólikter satylymynda jańa rekord ornatyldy. Qytaı avtomobıl dılerleri assotsıatsııasynyń habarlaýynsha, naryqta 20 mıllıonnan astam avtokólik satyldy. Bul týraly Sınhýa jazdy.

Ótken jyldyń jeltoqsan aıynda, qoldanylǵan avtokólikterdi qaıta tirkeý koeffıtsıenti — óńirler arasyndaǵy saýdanyń negizgi kórsetkishi — 34,9%-ǵa jetti. Bul bir jyl burynǵy kórsetkishten 4,7 paıyzdyq pýnktke joǵary boldy.

Assotsıatsııanyń orynbasary Lo Leıdiń aıtýynsha, bul jergilikti qoldanylǵan avtokólikter dılerleriniń qoımalaryndaǵy qysymdy azaıtýǵa múmkindik berdi.

2025 jyly Qytaıda jańa energııa kózderimen júretin qoldanylǵan avtokólikterdiń satylymy 1,6 mıllıonǵa jetip, barlyq qoldanylǵan avtokólikterdiń 7,9%-yn qurady. Bul kórsetkish ótken jylmen salystyrǵanda 2,2 paıyzdyq pýnktke ósken.

— Avtokólik ónerkásibindegi artyq básekelestikti azaıtý sharalary men eski avtokólikterdi jańasymen aıyrbastaý baǵdarlamalarynyń keńinen engizilýi arqasynda bıyl jańa kólikterdiń baǵasy turaqtalady dep kútilip otyr. Bul qoldanylǵan avtokólik naryǵyn damytý úshin odan ári qolaıly jaǵdaı týǵyzady, — deıdi Lo Leı.

Budan buryn 2025 jyly Tesla elektromobılder satylymynda qytaılyq BYD-den artta qalǵanyn jazǵanbyz. Bul Tesla-nyń qytaılyq BYD avtokompanııasyna álemdik satylymdar boıynsha birinshi ret jol berýi.