2025 jyly Qazaqstanǵa týrıst retinde 15,7 mln sheteldik keldi

ASTANA. KAZINFORM — Álemdik týrıstik reıtıngte Qazaqstannyń pozıtsııasy nyǵaıyp keledi. Bul týraly QR Týrızm jáne sport mınıstrligi Týrızm ındýstrııasy komıteti tóraǵasynyń mindetin atqarýshy Nurbol Baıjanov málim etti.

- 2025 jyly týrıstik sektor turaqty ósýin kórsetti. Ósim ishki jáne syrttan kelý týrızmi, sondaı-aq ornalastyrý obektileri kórsetetin qyzmetter kólemi boıynsha baıqaldy. 2025 jyldyń 9 aıynyń qorytyndysy boıynsha ornalastyrý oryndarynyń qyzmetterin paıdalanǵan ishki týrıster sany 6,7 mln adamdy qurady, bul 2024 jyldyń sáıkes kezeńimen salystyrǵanda 741,3 myń adamǵa artyq. Byltyr elge ár túrli týrıstik maqsatpen 15,7 mln sheteldik (2024 jyly - 15,3 mln adam) kelgen. Buǵan eńbek mıgranttary men turaqty turýǵa kelgen adamdar kirmeıdi. Osy oń dınamıka elge syrtqy naryqtar tarapynan qyzyǵýshylyqtyń artqanyn kórsetedi, - dedi N. Baıjanov Ortalyq kommýnıkatsııalar qyzmetindegi baspasóz másıhatynda.

Onyń aıtýynsha, qonaqúılerdi, demalys bazalary men jalǵa beriletin úılerdi qosa alǵanda, ornalastyrý obektileriniń jıyntyq tabysy 268 mlrd teńgeni qurady, bul kórsetkish 2024 jyldyń sáıkes kezeńimen salystyrǵanda 44 mlrd teńgege artyq. Ornalastyrý nysandarynyń sany 4 499-ǵa jetti.

- Qazaqstan álemdik týrıstik reıtıngte óz pozıtsııasyn nyǵaıtyp keledi. Dúnıejúzilik ekonomıkalyq forýmnyń Jahandyq ındeksinde Qazaqstan 119 eldiń ishinen 52-orynǵa kóterilgen, buryn 66-orynda bolǵan. Bul týrısterge yńǵaıly jaǵdaı jasaý men olardyń qaýipsizdigin arttyrý, ınfraqurylymdy jaqsartý jáne týrıstik obektilerdiń qoljetimdiligin arttyrý boıynsha júıeli jumystyń nátıjesin kórsetedi, - dedi komıtet basshysy.

Buǵan deıin habarlanǵandaı, 2025 jyly Kólsaı men Sharynǵa 850 myń týrıst barǵan.