2025 jyly qazaqstandyqtarǵa bala kútimine 806,8 mlrd teńge tólendi
ASTANA. KAZINFORM — Memlekettik járdemaqylarmen, sondaı-aq Memlekettik áleýmettik saqtandyrý qorynan balany bosanýǵa jáne bala 1,5 jasqa tolǵanǵa deıin onyń kútimine baılanysty jalpy somasy 806,8 mlrd teńgeni quraıtyn tólemdermen 565,7 myń adam qamtyldy, dep habarlaıdy Eńbekmıni baspasóz qyzmeti.
Al bala týǵanda beriletin járdemaqyny 2025 jyly respýblıkalyq bıýdjetten barlyǵy 61,1 mlrd teńge somasynda 338 myń adam qamtyldy, onyń ishinde jeltoqsan aıynda 4,7 mlrd teńge somasynda 25,9 myń adam aldy. Bul járdemaqyǵa bala týǵan, asyrap alǵan, sondaı-aq qamqorlyqqa alǵan balalary bar elimizdiń azamattary, qandastar, sondaı-aq Qazaqstanda turaqty turatyn sheteldikter úmitker bola alady.
— Balaǵa kútim jasaıtyn adam mindetti áleýmettik saqtandyrý júıesine qatysýshy bolyp tabylmaǵan jaǵdaıda týǵan, asyrap alǵan, sondaı-aq qorǵanshylyqqa alǵan balalary bar, eger olar basqa ata-ananyń otbasynda eskerilmese, ógeı balalary bar adamdardyń (otbasylardyń) bala kútimine baılanysty járdemaqy alýǵa quqyǵy bar. Esepti kezeńde 1,5 jasqa tolǵanǵa deıin bala kútimi boıynsha járdemaqymen 44 mlrd teńge somasyna orta eseppen 125,3 myń adam qamtyldy, onyń ishinde jeltoqsan aıynda 3,8 mlrd teńge somasynda 128,9 myń adam aldy, — delingen habarlamada.
Bala týýyna jáne bala kútimine arnalǵan memlekettik járdemaqylardyń mólsheri respýblıkalyq bıýdjet týraly zańmen tıisti qarjy jylyna bekitilgen aılyq eseptik kórsetkishke (budan ári — AEK) baılanysty belgilenedi.
2025 jyly bala týýyna arnalǵan járdemaqy mólsheri:
— birinshi, ekinshi, úshinshi balaǵa — 38,0 AEK nemese 149 416 teńge;
— tórtinshi jáne odan keıingi balalarǵa — 63,0 AEK nemese 247 716 teńgeni qurady.
Bala 1,5 jasqa tolǵanǵa deıin onyń kútimine baılanysty tólenetin járdemaqy aı saıyn kelesideı mólsherde tólendi:
— birinshi balaǵa — 5,76 AEK nemese 22 648 teńge;
— ekinshi balaǵa — 6,81 AEK nemese 26 777 teńge;
— úshinshi balaǵa — 7,85 AEK nemese 30 866 teńge;
— tórtinshi jáne odan keıingi balalarǵa — 8,90 AEK nemese 34 995 teńge.
Budan basqa jumys isteıtin azamattarǵa júktilikke jáne bosanýǵa, jańa týǵan balany (balalardy) asyrap alýǵa baılanysty kirisinen aıyrylǵan jaǵdaıda MÁSQ-tan tólenetin áleýmettik tólem júktiligi jáne bosanýy boıynsha berilgen demalystyń barlyq kúnine taǵaıyndalady. Tólem mólsheri júktiligi jáne bosanýy boıynsha ýaqytsha eńbekke jaramsyzdyq paraǵy berilgenge deıingi sońǵy 12 aı ishinde MÁSQ-ǵa áleýmettik aýdarymdar júrgizilgen ortasha aılyq kiriske jáne eńbekke jaramsyzdyq kúnderiniń sanyna baılanysty bolady.
Atalǵan birjolǵy tólemdi 2025 jyly jalpy somasy 276,2 mlrd teńgege 200,8 myń adam aldy, onyń ishinde jeltoqsan aıynda 16,3 mlrd teńge somasynda 17,1 myń adamǵa berildi. Esepti kezeńde taǵaıyndalǵan tólemniń ortasha mólsheri 1 415 135 teńgeni qurady.
Sondaı-aq MÁSQ-dan bala bir jarym jasqa tolǵanǵa deıin onyń kútimine baılanysty kirisinen aıyrylý jaǵdaıy boıynsha aı saıynǵy áleýmettik tólem mindetti áleýmettik saqtandyrý júıesine qatysýshyǵa balanyń týǵan kúninen bastap taǵaıyndalady. Tólemniń mólsheri sońǵy 2 jylda MÁSQ-ǵa áleýmettik aýdarymdar júrgizilgen ortasha aılyq kiristiń 40%-n quraıdy. Eki jáne odan da kóp bala týǵan jaǵdaıda tólem ár balaǵa jeke taǵaıyndalady.
2025 jylda bul tólem 425,5 mlrd teńgege 239,6 myń adamǵa taǵaıyndaldy. Onyń ishinde jeltoqsan aıynda 16,4 myń alýshyǵa taǵaıyndalǵan tólem somasy 33,1 mlrd teńgeni qurady. Esepti kezeńde tólemniń aı saıynǵy ortasha mólsheri 85 993 teńgeni qurady.
Osydan buryn Eńbek mınıstrligi arnaıy áleýmettik qyzmetter kórsetetin keıbir uıymdar úshin jańa standarttardy engizetini belgili boldy.