2025 jyly qazaqstandyqtar qostanaılyq KIA kóligin mine bastaıdy

ASTANA. KAZINFORM – Qostanaı oblysynda KIA avtokóligin shyǵaratyn zaýyt salynyp jatyr.

- Qazaqstanda ashylatyn «KIA» zaýyty Koreıa Respýblıkasynan tys alǵashqy birlesken kásiporyn. Kólik zaýyty rekordtyq qysqa merzimde (1,5 jyl ishinde) salynady. Qurylysy byltyr qarashada bastaldy, alǵashqy avtomobıl konveıerden 2025 jyldyń jazynda shyǵady. Qýaty jylyna 70 myń birlik jeńil kólik jáne 1,5 myń jańa jumys orny ashylady, - dedi Qostanaı oblysynyń ákimi Qumar Aqsaqalov óńirdiń áleýmettik-ekonomıkalyq damýy týraly esep bere turyp. 

Osylaısha, Qostanaı oblysynda avtomobıl shyǵaratyn ekinshi iri zaýyt ashylmaq. 

- Bul aımaqtyń otandyq avtomobıl jasaý ortalyǵyna aınalýyna múmkindik beredi. Sondaı-aq, bıyl avtobólshekter jasaıtyn zaýyttyń qurylysy bastaldy, - dep tolyqtyrdy óńir basshysy. 

Buǵan deıin Qumar Aqsaqalov Qostanaı oblysynda kedeı turatyn halyqtyń azaıǵanyn aıtqan edi.