2025 jyly qazaqstandyqtar 2,7 mlrd teńgeden astam saqtandyrý tólemderin aldy
ASTANA. KAZINFORM – «Memlekettik annýıtettik kompanııa» ómirdi saqtandyrý kompanııasy» AQ-nyń (budan ári – MAK) málimetine sáıkes, 2025 jyly 35 myńnan astam qazaqstandyqqa tólengen saqtandyrý tólemderiniń kólemi 2,7 mlrd teńgeden asty. Bul týraly Eńbek jáne halyqty áleýmettik qorǵaý mınıstrliginiń baspasóz qyzmeti habarlady.
– Búginde MAK mindetti jáne erikti baǵdarlamalar aıasynda ómirdi saqtandyrý qyzmetterin usynady. Negizgi mindetterdiń biri – qyzmetkerlerdi eńbek mindetterin oryndaý kezinde jazataıym oqıǵalardan mindetti saqtandyrýdy qamtamasyz etý.
Sonymen qatar biz saqtandyrý portfelin ártaraptandyrý men erikti ónimderdi damytýdyń mańyzyn túsinemiz. Osyǵan baılanysty AQSh dollarynda jınaqtaýǵa arnalǵan, kiristiliktiń eń joǵary mólsherlemesi bar Demeu ónimin satýdy iske qostyq, sondaı-aq zeınetaqy annýıtetteriniń tartymdylyǵyn arttyrý baǵytynda jumys júrgizýdemiz, - dep 2025 jyldyń qorytyndysyn MAK Basqarma tóraǵasy Qýanysh Muqajanov túıindedi.
Ol sonymen qatar Demeu Business ónimi arqyly kóptegen kompanııa negizgi qyzmetkerlerdiń turaqtylyǵy men yntalandyrý máselelerin sheship jatqanyn atap ótti.
– 2025 jyly MAK saqtandyrý (qaıta saqtandyrý) pýlynyń qatysýshysy atandy. Onyń aıasynda jazataıym oqıǵalardan mindetti saqtandyrý (budan ári – JOMS) sharttary boıynsha barlyq táýekel naryqtyń barlyq qatysýshysy arasynda jaýapkershilikti teń bólý arqyly proportsıonaldy qaıta saqtandyrýǵa beriledi. Qazirgi ýaqytta qaıta saqtandyrý lıtsenzııasyn alý boıynsha jumys júrgizilip jatyr, - dep habarlady MAK Basqarma tóraǵasy Qýanysh Muqajanov.
2025 jyly qyzmetkerlerdi mindetti saqtandyrý sharttary boıynsha jınalǵan saqtandyrý syılyqaqylarynyń kólemi 4,3 mlrd teńgeni qurap, bul MAK tarıhyndaǵy eń joǵary kórsetkish boldy.
Ótken jyly sondaı-aq keıingi 7 jyldaǵy rekordtyq kólemde JOMS sharttary boıynsha táýekelder qabyldandy. Barlyq saqtandyrý ónimderi boıynsha 3,7 myń shart jasalyp, olardyń aıasynda Qazaqstannyń 257 myńnan astam azamaty saqtandyrý qorǵanysymen qamtyldy.
Eske sala keteıik, 2004 jyly Úkimettiń bastamasymen qurylǵan kompanııaǵa el úshin jańa áleýmettik saıasat quraly – zeınetaqy annýıtetterin iske asyrý mandaty berildi. MAK respýblıkada alǵashqylardyń biri bolyp ómir boıǵy saqtandyrý tólemderi boıynsha sharttar jasasyp, qosymsha zeınetaqymen qamsyzdandyrý júıesin damytýdaǵy negizgi býynǵa aınaldy.
Saqtandyrylǵan qyzmetkerler úshin áleýmettik táýekelder týyndaǵan jaǵdaıda MAK-tan mynadaı tólem túrleri júzege asyrylady:
- densaýlyqqa keltirilgen zııanǵa baılanysty qosymsha shyǵyndardy óteý (dárilik zattar, ońaltý quraldary jáne shıpajaılyq-kýrorttyq emdeý);
- óndiristegi jazataıym oqıǵa saldarynan kásibı eńbekke qabilettiligin joǵaltqan tulǵalarǵa annýıtettik saqtandyrý boıynsha merzimdik tólemder;
- asyraýshysynan aıyrylýyna baılanysty annýıtettik saqtandyrý boıynsha merzimdik tólemder;
- zeınetaldy annýıtet sharttary boıynsha merzimdik tólemder (zııandy eńbek jaǵdaıynda jumys isteıtinder úshin);
- óndiristegi jazataıym oqıǵa saldarynan qyzmetker qaıtys bolǵan jaǵdaıda jerleý shyǵyndaryn óteý.
BJZQ-da jetkilikti mólsherde zeınetaqy jınaqtary bolǵan jaǵdaıda zeınetaqy annýıteti shartyn jasasý azamattarǵa belgilengen zeınetkerlik jasqa jetpeı-aq zeınetaqy tólemderin alýdy bastaýǵa múmkindik beredi. Atap aıtqanda, erler 55 jastan, al áıelder 53 jastan bastap tólemder ala alady. Sonymen qatar keminde bes jyl boıy mindetti kásibı zeınetaqy jarnalary tólengen azamattar tólemderdi 50 jastan bastap alý quqyǵyna ıe.
Zeınetaqy annýıtetiniń basty artyqshylyǵy – saqtandyrý kompanııasyna aýdarylǵan jınaq kólemine qaramastan, tólemderdiń ómir boıy júzege asyrylýy.
2026 jyly zeınetaqy annýıteti shartyn jasasý úshin qajetti jınaq somasy:
- erler úshin – 10 715 001 teńge;
- áıelder úshin – 14 039 988 teńge;
- mindetti kásibı jarnalary bar erler úshin – 8 713 438 teńge;
- mindetti kásibı jarnalary bar áıelder úshin – 11 667 514 teńge.
Buǵan deıin habarlaǵanymyzdaı, Áleýmettik medıtsınalyq saqtandyrý qory Qarjy mınıstrliginiń qaramaǵyna berildi.