2025 jyly Qazaqstanda rekordtyq astyq jınalyp, mektepter, turǵyn úıler men zaýyttar salyndy
ASTANA. KAZINFORM - Qazaqstan Úkimeti 2025 jyldyń qorytyndysyn naqty sandarmen túıindedi. El boıynsha jańa úıler, mektepter, zaýyttar salynyp, aýyl sharýashylyǵynda rekordtyq ónim jınaldy.
2025 jyldyń 11 aıynda 16,9 mln sharshy metr turǵyn úı paıdalanýǵa berildi
2025 jyldyń sońyna deıin bul kórsetkish 19,1 mln sharshy metrge jetedi degen úmit bar. Myńdaǵan otbasy jańa páter men úıge qonystandy. Qurylys qarqyny eldiń barlyq óńirinde artyp keledi.
Qazaqstanda 219 medıtsınalyq nysan salyndy
Medıtsına halyqqa jaqyndaı tústi. Eldiń kóptegen aýylynda jańa medıtsınalyq pýnktter ashyldy. Dáriger tapshylyǵy 19 paıyzǵa qysqardy.
130 jańa mektep esigin aıqara ashty
220 myń oqýshyǵa arnalǵan jańa oryndar qurylyp, 100-den astam mekteptegi oryn tapshylyǵy tolyq joıyldy. Qalada da, aýylda da balalarǵa qolaıly oqý jaǵdaıy jasalǵan.
Zeınetaqy men járdemaqyǵa 5,9 trln teńge bólindi
4,6 mln qazaqstandyqty memleket qoldap otyr. Áleýmettik qoldaý – bıýdjettiń basty basymdyǵy. 2026 jyldan bastap zeınetaqy men járdemaqy taǵy 10 paıyzǵa ósedi.
33 jańa zaýyt iske qosylyp, 150 kásiporyn jańǵyrtyldy
«Qazaqstanda jasalǵan» degen jazý endi turmystyq tehnıka men avtokólikterde de paıda boldy. Teledıdar men kir jýǵysh mashınalar óndirisi jolǵa qoıylyp, avtokólik zaýyttary salynp jatyr.
27,1 mln tonna astyq jınaldy
Agrarlyq sala ekinshi jyl qatarynan rekordtyq ónim berdi. El tolyqtaı azyq-túlikpen qamtylyp, eksport kólemi artýda.
13 myń shaqyrym jol salyndy jáne jóndeldi
Qalalar arasyndaǵy qatynas jyldam ári qaýipsiz bola tústi. Júk tasymaly kólemi 9,6 paıyzǵa ósti.
Halyqtyń 90 paıyzy ınternetpen qamtyldy
Qazaqstan Ortalyq Azııada alǵash bolyp «Starlink» spýtnıktik ınternetine qol jetkizgen el atandy.
Bir jylda 335,6 mln aǵash otyrǵyzyldy
2021 jyldan beri barlyǵy 1 mlrd 470 mln kóshet egildi. Prezıdenttiń «Taza Qazaqstan» bastamasy aıasynda el jasyl jelekke oranyp keledi. Bul – búgingi jáne keler urpaq úshin taza aýanyń kepili.
Ekonomıka ósimi – 6,4 paıyz
Qýatty ekonomıka – memlekettiń áleýmettik mindettemeleriniń kepili. Bul jalaqy, zeınetaqy tóleýge, jańa mektepter salýǵa, jahandyq naryqtaǵy turaqsyzdyqqa qaramastan, múmkindik beredi.
Osyǵan deıin Kazinform agenttigi 2025 jyldy qorytyndylap, jańa joba – álemge eń kóp áser etken tulǵalar men oqıǵalardyń reıtıngin túzdi.