2025 jyly Qazaqstan-Túrkııa arasyndaǵy temirjol arqyly júk tasymaly 6,4 mln tonnaǵa jetti
ASTANA. KAZINFORM — Qazaqstan men Túrkııa arasynda temirjolmen júk tasymalynyń básekege qabilettiligin arttyrý úshin biryńǵaı tarıfterdi qalyptastyrý jumysyn jalǵastyrý kerek.
Bul týraly Úkimet úıinde Túrkııa vıtse-prezıdenti Jevdet Iylmazben Saýda-ekonomıkalyq yntymaqtastyq jónindegi komıssııanyń 14-otyrysyn ótkizip jatqan Premer-mınıstr Oljas Bektenov aıtty.
— Kólik jáne logıstıka salasyndaǵy yntymaqtastyq qarqyndy damyp keledi jáne strategııalyq sıpatqa ıe. 2025 jyldyń qorytyndysy boıynsha Qazaqstan men Túrkııa arasyndaǵy temirjol arqyly júk tasymaly 6,4 mln tonnany qurap, 35 paıyzǵa ósti. Bul — eki el arasyndaǵy saýda-ekonomıkalyq baılanystardyń naqty nátıjesi. Transkaspıı halyqaralyq kólik baǵyty boıynsha tasymal kólemi 4 mln tonnadan asty, — dedi Úkimet basshysy.
Premer-mınıstrdiń dereginshe, sońǵy jyldary Orta dálizdiń róli aıtarlyqtaı kúsheıip, tasymal kólemi 5 eseden astam ósti. Búginde bul baǵyt Eýropa men Azııa arasyndaǵy senimdi jáne básekege qabiletti kólik dálizi retinde qalyptasyp keledi. Júkterdi jetkizý merzimi 13 kúnge deıin qysqartyldy.
— Orta dálizdi damytý — bizdiń ortaq basymdyǵymyz. Osy baǵytta ınfraqurylymdy jańǵyrtý, «tar» ýchaskelerdi joıý, porttyq jáne termınaldyq qýattardy keńeıtý boıynsha júıeli jumys júrgizilip jatyr. Tasymaldardyń básekege qabilettiligin arttyrý maqsatynda biryńǵaı tarıfterdi qalyptastyrý, tarıftik saıasatty úılestirý jáne tsıfrlyq sheshimderdi engizý boıynsha birlesken jumysty jalǵastyrý qajet, — dedi Oljas Bektenov.
Budan buryn elimizde kólik salasynda kórsetilgen qyzmet kólemi 2,9 trln teńgege jetkenin jazǵanbyz.
